კორონავირუსის საწინააღმდეგო ვაქცინასთან დაკავშირებით პარლამენტში საზოგადოებრივი ჯანმრთელობის შესახებ კანონში შესატანი ცვლილებები დაინიცირდა. როგორც ქართული ოცნების ლიდერმა, მამუკა მდინარაძემ განაცხადა მიმდინარე კვირაში პარლამენტი რიგგარეშე სესიის ფარგლებში შეიკრიბება და დაამტკიცებს რა სახის ვაქცინის შემოტანაა შესაძლებელი ქვეყანაში და რა პასუხისმგებლობა ეკისრება სახელმწიფოს.

კერძოდ, მისი განმარტებით, კოვიდ 19-ის საწინააღდეგო აცრისათვის შესაძლებელი იქნება მხოლოდ ჯანდაცვის მსოფლიო ორგანიზაციის მიერ აღიარებული ვაქცინის შემოტანა. ამასთანავე, ჩატარებული აცრების შემდგომი გვერდითი მოვლენების ან გართულებების განვითარების შემთხვევაში, სახელმწიფო, კანონით დადგენილი წესით, უზრუნველყოფს მოსახლეობის უფასო სამედიცინო მომსახურებას და რეაბილიტაციას, გარდა იმ შემთხვევებისა, როდესაც აცრების შემდგომი გვერდითი მოვლენები გამოწვეულია იმპორტიორის, სამედიცინო პერსონალის, თუ სამედიცინო დაწესებულების დაშვებული შეცდომით.

ჯანმრთელობის დაცვისა და სოციალურ საკითხთა კომიტეტის თავმჯდომარის, დიმიტრი ხუნდაძის განცხადებით, მსგავსი პასუხისმგებლობა სახელმწიფოს კალენდარულ აცრებზეც აქვს, ეს მოთხოვნები კი კოვაქს პლატფორმაზეა წამოყენებული.

"მნიშვნელოვანია რომ ვაქცინის შემოტანის პროცესში შესაძლო დამდგარ ზიანზე აიღოს სახელმწიფომ პასუხისმგელობა, თუ დაშვებული შეცდომა არ იქნება განპრიობებული ექიმის, კლინიკის, მწარმოებლის ან იმპორტიორის მიერ. ასეთი მოთხოვნა წაყენებულია კოვაქს პლატფორმაზე მწარმოებელი ქვეყნების მიერ. [...]

ახალი ამაში მნიშვნელოვნად არაფერია, რამეთუ კალენდარული აცრების შემთხვევაში მსგავსი ჩანაწერი — სახელმწიფოს პასუხისმგებლობა — არსებობს შესაძლო დამდგარ ზიანთან დაკავშირებით. ეს პასუხისმგებლობა უნდა აიღოს ქვეყანამ კოვიდ ვაქცინასთან დაკავშირებითაც", — განაცხადა ხუნდაძემ.

21 იანვარს მთავრობის სხდომაზე საქართველოში ვაქცინაციის დანერგვის ეროვნული გეგმა დაამტკიცეს. ჯანდაცვის მინისტრის მოადგილემ, თამარ გაბუნიამ აღნიშნა, რომ ეს იქნება გზამკვლევი კოვიდსაწინააღმდეგო ვაქცინის დანერგვისთვის წლის ბოლომდე.

გაბუნიას განმარტებით, გეგმის ძირითადი ამოცანა ვაქცინაციით მოსახლეობის 60%-ის მოცვაა. მისი თქმით, ამის შედეგად მოსახლეობის უმრავლესობა იქნება დაცული და სახელმწიფოს მიეცემა შესაძლებლობა, ეკონომიკა გახსნას უსაფრთხოდ და ქვეყანაში ინფექციის გავრცელების რისკები აღმოფხვრას.

მინისტრის მოადგილის განცხადებით, გამომდინარე იქედან, რომ სიტუაცია ვაქცინებთან დაკავშირებით მუდმივად იცვლება და განახლებადია, გეგმაც მასთან შესაბამისად ადაპტირდება და შეიცვლება.

"დღეს თუ ჩვენ ავტორიზებული ვაქცინებიდან ვსაუბრობთ Pfizer, Moderna-სა და AstraZeneca-ზე, გეგმაში და შემუშავების პროცესში არის კიდევ ვაქცინების გარკვეული რაოდენობა, რომელიც საკმაოდ პერსპექტიულია და ეს მეტად მრავალფეროვანს გახდის ბაზარს. ჩვენც, ბუნებრივია, ჩვენს გეგმაში ავსახავთ ვაქცინებს, რომლებიც იქნება ეფექტური და ხარისხიანი", — აღნიშნა გაბუნიამ.

გაიგეთ მეტი:

• საქართველოს ვაქცინაციის გეგმა — მოკლედ