NDI-ის კვლევის თანახმად, გამოკითხული მოსახლეობის 38% ფიქრობს, რომ საქართველო არასწორი მიმართულებით ვითარდება. 32% ამბობს, რომ ქვეყანა სწორი მიმართულებით ვითარდება, ხოლო 22%-ის აზრით, იგი საერთოდ არ იცვლება. რაც შეეხება 8%-ს, მათი პასუხია არ ვიცი.

ახალი კვლევის მიხედვით, ასაკობრივი კატეგორიები აღნიშნულ კითხვაზე ასე გადანაწილდა:

  • 18-34 ასაკობრივ კატეგორიაში 30% მიიჩნევს, რომ ქვეყანა სწორი მიმართულებით ვითარდება, 24% — საქართველო საერთოდ არ იცვლება, 38% — არასწორი მიმართულებით ვითარდება;
  • 35-54 ასაკობრივ კატეგორიაში 33% მიიჩნევს, რომ ქვეყანა სწორი მიმართულებით ვითარდება, 23% — საქართველო საერთოდ არ იცვლება, 37% — არასწორი მიმართულებით ვითარდება;
  • 55+ ასაკობრივ კატეგორიაში 33% მიიჩნევს, რომ ქვეყანა სწორი მიმართულებით ვითარდება, 18% — საქართველო საერთოდ არ იცვლება, 38% — არასწორი მიმართულებით ვითარდება;

ფოტო: NDI

აღნიშნულ კითხვაზე გამოკითხულთა 31% ქართული ოცნების მხარდამჭერი იყო, 14% ოპოზიციის, ხოლო 54%-მა არ დაასახელა პარტია.

კვლევა 2020 წლის 17-24 დეკემბრის პერიოდში ჩატარდა. სატელეფონო ინტერვიუს გზით ქვეყნის მასშტაბით 2 053 სრულწლოვანი ადამიანი გამოიკითხა (ოკუპირებული ტერიტორიების გამოკლებით). რესპონდენტები მარტივი შემთხვევითი შერჩევის გზით — შემთხვევით ნომერზე დარეკვის მეთოდით შეირჩნენ. ინტერვიუები ჩატარდა ქართულ, აზერბაიჯანულ, სომხურ და რუსულ ენებზე.

კვლევის საშუალო ცდომილების ზღვარი +/- 1.1%-ია. NDI-ში განმარტავენ, რომ ახალი მონაცემების კვლევის წინა ტალღებთან შედარებისას გასათვალისწინებელია, რომ ინტერვიუს მეთოდის ცვლილება შესაძლოა ცდომილებაზე აისახოს.