მოქალაქეებმა, რომლებსაც თბილისში აქვთ მიწები, სადაც მშენებლობა დაშვებული იყო და ახალი გენგეგმით აიკრძალა, მერიას უნდა მიმართონ. კახა კალაძის განცხადებით, ამ საკითხს სპეციალური კომისია ინდივიდუალურად განიხილავს.

თბილისის მერმა განმარტა, რომ არსებობს მიწის ნაკვეთები, სადაც ადრე მშენებლობა დაშვებული იყო, 2019 წელს მიღებული გენგეგმის მიხედვით კი მათ რეკრეაციული, ლანდშაპტური, სატყეო ან სხვა ტიპის ზონის სტატუსი მიენიჭა და შესაბამისად, მფლობელებს მშენებლობის უფლება წაერთვათ. კალაძის თქმით, მოქალაქეთა განცხადებებს შესაბამისად, კონკრეტულ მონაკვეთებზე სტატუსის ცვლილების შესახებ გადაწყვეტილება შესაძლოა გადაიხედოს, სხვა შემთხვევაში კი კერძო მესაკუთრეებს ადგილმონაცვლეობას შესთავაზებენ.

"ურბანული სამსახური, არქიტექტურის სამსახურთან ერთად, გაივლის ამ კონკრეტული მიწის ნაკვეთის არსებულ სტატუსს — რა იყო გენგეგმის მიღებამდე და რა მდგომარეობა გვაქვს ახლა, არის თუ არა შესაძლებელი, დაუბრუნდეს ძველი სტატუსი, თუ ეს არ დააზიანებს ქალაქის ურბანულ განვითარებას. თუ ამ თვალსაზრისით პრობლემაა, მზად ვართ, ასეთ შემთხვევაში, ადგილმონაცვლეობა განვახორციელოთ. არც ერთი შემოსული განცხადება პასუხგაუცემელი არ დარჩება. შექმნილია შესაბამისი ჯგუფი. ამიტომ, იაქტიურეთ, ვისაც გაუუარესდა მიწის ნაკვეთების სტატუსი. ჩვენ მაქსიმალურად ვითვალისწინებთ თქვენს ინტერესებს", — განაცხადა კახა კალაძემ.

მისი თქმით, გენგეგმის მიღება მნიშვნელოვანი იყო ქალაქის ურბანული განვითარებისთვის, რადგან, იგი თავიდან აგვაცილებს კოეფიციენტის გადამეტებას, ქალაქის არასწორი განვითარებას, რეკრეაციული სივრცეებისა და სპორტული მოედნების ხარჯზე მშენებლობებზე ნებართვების გაცემას და ა.შ. თუმცა, კალაძემ აღნიშნა ისიც, რომ გენგეგმა კერძო მესაკუთრეებს ინტერესების უგულებელყოფის ხარჯზე არ უნდა განხორციელდეს.