რუმინეთის თითქმის ყველა დიდი ქალაქი მოიცვა საპროტესტო ტალღამ. მიზეზი მთავრობის მიერ გამოცემული დეკრეტი გახდა, რომლის მიხედვითაც, ხდება კორუფციასთან დაკავშირებული არაერთი დანაშაულის დეკრიმინალიზება, შესაბამისად, ამ ბრალდებით დაპატიმრებული პირები ციხეებს დატოვებენ.

BBC-ის ინფორმაციით, სულ მცირე, 150 ათასი ადამიანი შეიკრიბა გუშინ ბუქარესტში, საპროტესტო გამოსვლები გაიმართა სხვა ქალაქებშიც, ისმოდა მოწოდებები მთავრობის გადადგომის მოთხოვნით.

ბუქარესტის მთავრობამ, რომელიც სოციალ-დემოკრატების მიერაა დაკომპლექტებული, განაცხადა, რომ აღნიშნული დეკრეტი სჭირდებათ გადატვირთული ციხეების გასათავისუფლებლად. დეკრეტის მიხედვით, მოხდება არაერთი სახის სამოხელეო დანაშაულის დეკრიმინალიზაცია, სადაც გაფლანგული თანხის ოდენობა 44 ათას ევროს არ აჭარბებს. ოპონენტები ამბობენ, რომ აღნიშნული გადაწყვეტილება მემარცხენე პრემიერმინისტრმა, სორინ გრინდენაუმ კორუფციისა და გაფლანგვის ბრალდებით დაკავებული საკუთარი თანაგუნდელების ციხიდან დასახსნელად მიიღო.

დეკრეტი ძალაში უკვე შევიდა, შესაბამისად, ციხეს დატოვებს არაერთი ყოფილი მაღალჩინოსანი, რომლებიც კორუფციის, უფლებამოსილების გადამეტებისა და ბიუჯეტის თანხის გაფლანგვისთვის იხდიან სასჯელს, მათ შორისაა სოციალ-დემოკრატიული პარტიის ლიდერი, ლივიუ დრაგნეა, რომელიც 24 ათასი ევროს გაფლანგვისთვის გაასამართლეს.