ჯეოსელმა კონსოლიდირებულ ტენდერში მონაწილეობის მიღებისგან თავი საქართველოს კომუნიკაციების ეროვნული კომისიის (GNCC) მიერ გაგზავნილი წერილის შემდეგ შეიკავა. სახელმწიფო კონსოლიდირებული შესყიდვა სატელეკომუნიკაციო სფეროში 2017 წლის 1 თებერვლიდან 2018 წლის 31 იანვრამდე მომსახურების გაწევაზე იყო გამოცხადებული. განაცხადი კი, მხოლოდ ერთმა კომპანიამ - ბილაინმა (შპს მობიტელი) შეიტანა, რომელთანაც ხელშეკრულება არ დაიდო.

„დროის სიმცირის გამო ჯეოსელი სრულყოფილად ვერ მოახერხებდა კომისიის გაფრთხილების გაუთვალისწინებლობის შესაძლო შედეგების განსაზღვრას. კომპანიამ მიზანშეწონილად ჩათვალა, საკითხის დეტალურად გარკვევამდე თავი შეეკავებინა ტენდერში მონაწილეობის მიღებისგან,” - განმარტავენ ჯეოსელში.

საქართველოს კომუნიკაციების ეროვნულმა კომისიამ სატელეკომუნიკაციო კომპანიებს ჯეოსელს, მაგთისა და ბილაინს წერილი გაუგზავნა, რომლითაც აცნობა, რომ სახელმწიფოს მიერ გამოცხადებულ კონსოლიდირებულ შესყიდვაში მონაწილეობის შემთხვევაში კომისია შეისწავლიდა, კონკურენციის უზრუნველყოფის მიზნით, მათზე დაკისრებული სპეციფიკური ვალდებულებების საკითხს.