საგანგებო სიტუაციების მართვის სამსახურის განცხადებით, რაჭაში ყველა ხანძარი ლიკვიდირებულია. როგორც უწყებაში ამბობენ, მონიტორინგის მიზნით სახანძრო-სამაშველო ჯგუფები ადგილზე რჩებიან.

უწყებაში აცხადებენ, რომ ხანძრის 4 კერაა დარჩენილი სამეგრელო-ზემო სვანეთში — მათგან სამი ლოკალიზებულია და მიმდინარეობს სალიკვიდაციო სამუშაოები, ხოლო ერთზე გრძელდება სალოკალიზაციო სამუშაოები.

ხანძარი ლოკალიზებულია წალენჯიხაში, სოფელ სქურში არსებულ ორ კერაზე და სოფელ ფახულანში. ხოლო სალოკალიზაციო სამუშაოები გრძელდება მარტვილში, სოფელ დობარაზენში.

ასევე ლოკალიზებულია ხანძარი, შიდა ქართლშიც. კასპში, რკონის ხეობაში წყლის მაგისტრალები მიყვანილია ხანძრის კერებამდე და მიმდინარეობს სალიკვიდაციო სამუშაოები.

უწყებაში აღნიშნავენ, რომ 500 მეხანძრე-მაშველი დარჩენილ კერებს სრულად აკონტროლებენ. ღამის განმავლობაში გაგრძელდება აღნიშნული კერების მონიტორინგი, აქტიური სამუშაოები კი გათენებისთანავე განახლდება. გარდა ამისა, საგანგებო სიტუაციების მართვის სამსახურში ამბობენ, რომ მოსახლეობას საფრთხე, არც ერთ კერაზე არ ემუქრება და ამ ხნის განმავლობაში არავინ დაშავებულა.

4 იანვრის შემდეგ საქართველოს მასშტაბით, ტყისა და მინდვრის ხანძრის 265 შემთხვევა დაფიქსირდა, საიდანაც 255 ლიკვიდირებულია 4 ლოკალიზებული.