პარლამენტის თავდაცვისა და უშიშროების კომიტეტის თავმჯდომარის მოადგილეებად ალექსანდრე ტაბატაძე და ვლადიმერ ჩაჩიბაია დასახელდნენ.

თავდაცვისა და უშიშროების კომიტეტის სხდომაზე კომიტეტის თავმჯდომარემ, ირაკლი ბერაიამ კომიტეტის წევრებს თავმჯდომარის პირველ მოადგილედ ალექსანდრე ტაბატაძის კანდიდატურა წარუდგინა. ფრაქცია ქართული ოცნების სახელით კი კომიტეტის თავმჯდომარის მოადგილედ ვლადიმერ ჩაჩიბაიას კანდიდატურა წარედგინა.

დღეს, ასევე, დასახელდნენ ევროპასთან ინტეგრაციის კომიტეტის თავმჯდომარის მოადგილეები — მარიამ ქვრივიშვილი და ლევან ქარუმიძე.

მოადგილეობის კანდიდატები კომიტეტის თავმჯდომარემ, მაკა ბოჭორიშვილმა წარადგინა.

საქართველოს მე-10 მოწვევის პარლამენტის თავმჯდომარე კვლავ არჩილ თალაკვაძე იქნება. პირველი ვიცე-სპიკერის პოსტს ისევ გია ვოლსკი დაიკავებს, დანარჩენი მოადგილეები კი კახა კუჭავა და დავით სერგეენკო იქნებიან. საპარლამენტო უმრავლესობას ქართული ოცნების გენერალური მდივანი, ირაკლი კობახიძე უხელმძღვანელებს, ხოლო ფრაქცია ქართული ოცნების თავმჯდომარე მამუკა მდინარაძე იქნება.