თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის დირექტორის, ლევან რატიანის განცხადებით, თუ ადამიანებმა არ შეიცვალეს ფსიქოლოგიური განწყობა და თუ სახელმწიფომ კონსერვატორული მიდგომა არ აირჩია, ქვეყნის ჯანდაცვის სისტემა აუცილებლად ძალიან მალე ჩამოინგრევა. ამის შესახებ რატიანმა რუსთავი 2-ის ეთერში ისაუბრა.

"აუცილებლად დადგება მომენტი, საექიმო საზოგადოება შეწყვეტს ჰუმანურ მიდგომას, რაც ძალიან ცუდია, მაგრამ, თუ ასე გაგრძელდა, გარდაუვალია და აღნიშნულიდან გამომდინარე მკურნალობა წავა არჩევითად და ექიმობა თავის პრინციპს დაკარგავს. ადამიანები, ვისაც სჭირდებათ ჰოპსიტალიზაცია, მათ ამ სერვისს სამედიცინო დაწესებულებები ვერ გაუწევენ. თუ ამის დრო დარჩა და ინფექციის ჯაჭვის გაწყვეტას ან შეკავებას მოახდენს ქართული საზოგადოება, ალბათ, ეს იქნება მთავარი ამოსავალი წერტილი ჩვენი გადარჩენის", — განაცხადა ლევან რატიანმა.

რატიანის თქმით, სასწრაფო სამედიცინო დახმარება აკეთებს ტრიაჟს, ამიტომ ისინი ძალიან დატვირთულები არიან და როგორც ახლა ხდება გამოძახების დაყოვნება, უარესად დაყოვნდება და ამიტომ ვერ მოხვდებიან მიზანმიმართული ჯგუფი კლინიკებში.