ჯანდაცვის მინისტრის ეკატერინე ტიკარაძის თქმით, საქართველოში გამორიცხული არ არის, რომ კორონავირუსის მესამე ტალღაც იყოს. ამის შესახებ მან იმედის ეთერში ისაუბრა.

"როგორც ჯანდაცვის მსოფლიო ორგანიზაცია, ასევე საქართველოც არ გამორიცვხავს მესამე ტალღას. ეს დაანონსებული იყო ჯერ კიდევ გაზაფხულზე. ზოგადად ვირუსს გაზაფხულზე და ზამთრის ბოლო პერიოდზე ახალი ტალღის თვისობრიობა აქვს, კოვიდის ქცევაშიც მეცნიერები სწორედ ამას ვარაუდობენ, აქედან გამომდინარე, ჩვენ ყოველდღიურ რეჟიმში ვცდილობთ, რომ მოცულობები გავზარდოთ ჯანდაცვის სფეროში, იმისთვის, რომ ყველა პაციენტისთვის იყოს ხელმისაწვდომი მკურნალობა. მომდევნო ორ კვირას იქნება საჭირო დიდი ძალისხმევა ჯანდაცვის სფეროს ყველა წამომადგენლისგან", — განაცხადა ტიკარაძემ.

23 ნოემბერს საქართველოში კორონავირუსის 3 958 ახალი შემთხვევა დადასტურდა, გამოჯანმრთელდა — 3 531, გარდაიცვალა — 36.

ქვეყანაში პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 108 690-ს. ჯამში გამოჯანმრთელებულთა რაოდენობა გაიზარდა 89 170-მდე. 2020 წლის 26 თებერვლიდან დღემდე სულ გვაქვს 1 012 გარდაცვალების შემთხვევა.