ექს-პრეზიდენტი მიხეილ სააკაშვილი ამბობს, რომ ოპოზიციამ ბრძოლა უნდა გააგრძელოს და ხელისუფლება უნდა გამოფიტოს. მან ამის შესახებ მთავარი არხის ეთერში ისაუბრა.

"მე მინდა მართლაც მხარი დავუჭირო ოპოზიციის ლიდერების ერთიანობას, აბსოლუტურად გმირულ ძალისხმევას ხალხთან ერთად. მინდა ვუთხრა ყველას, რომ ხვალ ექვს საათზე აუცილებლად უნდა მივიდნენ რუსთაველზე. ესენი უდნა დავღალოთ, ძალიან სუსტები არიან. თუკი რამე მესმის... ესენი ახლა წკიპზე არიან", — განაცხადა მიხეილ სააკაშვილმა.

მას შემდეგ, რაც სამართალდამცავებმა მოქალაქეების წინააღმდეგ წყლის ჭავლი კიდევ ერთხელ გამოიყენეს, ნიკა მელიამ და ალეკო ელისაშვილმა განაცხადეს, რომ აქცია 9 ნოემბერს რუსთაველზე გაგრძელდებოდა, ხოლო ახლა პერიმეტრს ნელ-ნელა დატოვებდნენ. მომიტინგეების ნაწილი დაშლას არ აპირებს.

სპეცრაზმმა აქცია გაფრთხილების გარეშე დაშალა — რა ხდება ცესკოსთან

8 ნოემბერს ოპოზიციამ პარლამენტთან საპროტესტო აქცია გამართა, რომელზეც მთავრობას სამი მოთხოვნა წამოუყენა და დრო რვა საათამდე მისცა. ისინი ხელახალ არჩევნებს, ცესკოს თავმჯდომარის გადადგომას და პოლიტპატიმრების გათავიუფლებას ითხოვდნენ. ულტიმატუმის ვადის ამოწურვის შემდეგ ნიკა მელიამ განაცხადა, რომ მათთან კონტაქტზე მყოფმა ირაკლი კობახიძემ და არჩილ თალაკვაძემ ხვალ შეხვედრა შესთავაზეს, რასაც არ დათანხმდებოდნენ. ეს კობახიძემ უარყო და ამტკიცებდა, რომ შეხვედრა ოპოზიციამ მათ შესთავაზა და ამას მხოლოდ პარტნიორების სურვილის შემთხვევაში დათანხმდებოდნენ.

რვა საათის შემდეგ ოპოზიციამ განაცხადა, რომ ცესკოსთან გადაინაცვლებდნენ და არავის მისცემდნენ შიგნით შესვლის ან იქედან გამოსვლის უფლებას. სანამ ოპოზიიცია მსვლელობით მივიდოდა, ცესკოსთან რამდენიმე ადამიანი შეიკრიბა. ადგილზე მობილიზებული იყო პოლიცია, რომელთა რაოდენობამ იზრდებოდა. ცესკოსთან მოხდა რამდენიმე დაპირისპირებაც, თუმცა მალევე აღმოიფხვრა.

ამის შემდეგ კი ადგილზე სპეცრაზმი გამოჩნდა, რომელმაც გაფრთხილების გარეშე დაიწყო წყლის ჭავლის გამოყენება აქციის მონაწილეების წინააღდეგ. აქციაზე გაუშვეს სავარაუდოდ ცრემლსადენი გაზიც, თუმცა შსს ამას უარყოფს. რაც შეეხება წყლის ჭავლს, ამას პროპორციულ ძალად მიიჩნევს. ამ ეტაპზე არსებული ინფორმაციით, აქციის დაშლისას 2 ადამიანი დაშავდა.

უფლებადამცველები, ყოფილი და მოქმედი სახალხო დამცველები კი აცხადებენ, რომ აქციის დაშლა ამ მეთოდით არაკანონიერი იყო და არღვევდა გამოხატვის თავისუფლებას. მათივე თქმით, ეს იყო სასტიკი და არაპროპორციული ძალა.

გაიგეთ მეტი მომხდარის პოლიტიკურ შეფასებებზე: