საბურთალოს დამოუკიდებელი მაჟორიტარი დეპუტატობის კანდიდატმა, თამარ მაყაშვილმა განაცხადა, რომ სურს, იყოს "მღაღადებელი, მიმტან-მომტანი მთავრობასა და ჩვეულებრივ ხალხს შორის".

"ნამდვილად არასდროს ვყოფილვარ პარტიის წევრი, არც ახლა ვაპირებ პარტიის წევრობას, არ მიზიდავს. ცოტა მსახიობურად მივუდგები, როგორც ხელოვანი. ბატონი დიდი მუხრან მაჭავარიანის სიტყვები გამახსენდა — "ხმას ამოიღებ — ვაია! ჩუმად იქნები — უი! ვინც ლაპარაკობს, — ხომ სტყუის! ვინც სდუმს, ის უფრო სტყუის!" და მომბეზრდა დუმილი",— განაცხადა მაყაშვილმა რუსთავი 2-ის ეთერში.

მისივე თქმით, წინასაარჩევნო კამპანია აუცილებლად ექნება და ფეხით, ტრანსპორტით, ავოტბუსით თუ მეტროთი მგზავრობისას მივა ამომრჩევლებთან და თავის პროგრამას შესთავაზებს.

"კულტურული პროგრამა მაქვს საოცარი, რომელსაც შევთავაზებ ჩემს ამომრჩეველს იმიტომ, რომ ჩვენ კულტურული განვითარების ქვეყანა ვიყავით და ნელ-ნელა რატომღაც უკან მივიწევთ. არის უამრავი საკითხი. გასაგებია, რომ პოლიტიკოსად არავინ არ იზრდება, არ იბადება. მე ვუზივარ ახლა ამ ყველაფერს, ალილუიასავით ვიზუთხავ და ვსწავლობ, რომ ეს არ იყოს მხოლოდ თითიდან გამოწოვილი", — განაცხადა მაჟორიტარობის კანდიდატმა.

თამარ მაყაშვილმა 21 სექტემბერს განაცხადა, რომ დამოუკიდებელ მაჟორიტარად საბურთალოზე კენჭს იყრის. მისი თქმით, კენჭისყრა მას შემდეგ გადაწყვიტა, რაც მიხვდა, რომ წლები მიდის, მაგრამ არაფერი იცვლება.