დაავადებათა კონტროლის ცენტრის ხელმძღვანელი, ამირან გამყრელიძე ბოლო დღეებში პრეპარატ პლაქვენილის გარშემო არსებულ დისკუსიას გამოეხმაურა. მისი თქმით, პრეპარატი 40-50 წელია უკვე არსებობს და ბევრი დაავადების დროსაა გამოცდილი.

მისივე თქმით, ქართული პროტოკოლი საუკეთესო საერთაშორისო გამოცდილებას ეყრდნობა.

"გუშინ ჩემი ოჯახი გააჟღერეს სხვადასხვა ადამიანებმა დებატებში. არაა საჭირო ამაზე საუბარი, რა. სწორედ უმკურნალეს ჩემს შვილს, კიდევ ერთხელ გეუბნებით. იმიტომაც შედარებით სწრაფად გამოჯანმრთელდა", — აღნიშნა გამყრელიძემ.

როგორც NCDC-ის ხელმძღვანელი ამბობს, მსგავს საკითხებზე პროფესიულ წრეებში უნდა იდისკუსიონ და არა ტელევიზიებში ან ფეისბუქში.

"გასაგებია, განიხილეთ ეს პროფესიულ საზოგადოებაში, მაგრამ ასეთ შეურაცხყოფას ადამიანებს ნუ მიაყენებთ. არ შეიძლება, რა. განსაკუთრებით მივმართავ ჩემს ახალგაზრდა კოლეგებს, ჩვენ ვაფასებთ მათ განათლებას, ამერიკული, ბრიტანული გერმანული, რა ჯობია ამას. კიდევ სხვა რამეა საჭირო — წლები, რაც ექიმობას მოაქვს. ამიტომ საქართველოს ერთ-ერთ ცნობილ ექიმს, მოდით ნუ შევეხებით ასე... არ მინდა სხვა სიტყვა ვიხმარო", — თქვა გამყრელიძემ.

რამდენიმე დღის წინ ამერიკაში მცხოვრებმა ქართველმა ექიმმა, ზურაბ გურულმა ფეისბუქზე კორონავირუსის მკურნალობის ქართული პროტოკოლი გააკრიტიკა. მან ასევე განაცხადა, რომ სწორედ ამ პროტოკოლის მიხედვით, პრეპარატ პლაქვენილით საქართველოში უსიმპტომო და მსუბუქ პაციენტებს მკურნალობენ, რაც დაუშვებელი და სახიფათოა.

ქართული პროტოკოლის თანაავტორმა და კორონავირუსის კლინიკური კონტროლის ჯგუფის ხელმძღვანელმა, თენგიზ ცერცვაძემ კი ზურაბ გურული "ფაქტობრივი ტყუილის გავრცელებაში" დაადანაშაულა და თქვა, რომ ქართული პროტოკოლით პრეპარატი მხოლოდ მძიმე ან განსაკუთრებით მძიმე პაციენტებს ენიშნებათ.

ამ ამბებს დაემატა რადიო თავისუფლების მიერ მომზადებული ინტერვიუ ერთ-ერთ ინფიცირებულ პაციენტთან, რომელიც ამბობს, რომ მსუბუქი სიმპტომების მიუხედავად, პლაქვენილი დაუნიშნეს.

ამ თემაზე დეტალურად წაიკითხეთ: