გალში ინციდენტების პრევენციისა და მათზე რეაგირების მექანიზმის (IPRM) რიგით 41-ე შეხვედრა გაიმართა. ამის შესახებ სახელმწიფო უსაფრთხოების სამსახურმა განცხადება გაავრცელა.

როგორც უწყება წერს, საქართველოს ცენტრალური ხელისუფლების წარმომადგენლებმა შეხვედრაზე კიდევ ერთხელ დააყენეს მიმდინარე წლის 19 მაისს, ზუგდიდის რაიონის სოფელ ხურჩაში საქართველოს მოქალაქის გიგა ოთხოზორიას მკვლელობის გამოძიების საკითხი და ბრალდებული პირის რაშიდ კანჯი ოღლის დაკავების აუცილებლობაზე ისაუბრეს. ამას გარდა, შეხვედრაზე საუბარი შეეხო საოკუპაციო ხაზთან მცხოვრები ეთნიკურად ქართველი მოსწავლეებისთვის გადაადგილების თავისუფლების აუცილებლობის საკითხებს.

სუს-ის ცნობით, შეხვედრაზე ასევე ისაუბრეს 2012 წელს, ოკუპირებული გალის რაიონში დაკავებული საქართველოს მოქალაქის ზაზა წულუკიას საკითხს:

"დე ფაქტო ხელისუფლების წარმომადგენლებმა განაცხადეს, რომ აღნიშნული პირი თვითმკვლელობის შედეგად არის გარდაცვლილი, ხოლო ცხედარი სოხუმშია დასაფლავებული. აღნიშნულ საკითხზე ცენტრალური ხელისუფლების წარმომადგენლებმა დააფიქსირეს, რომ ოჯახის ჩართულობით და წითელი ჯვრის საერთაშორისო კომიტეტის დახმარებით აუცილებელია ცხედრის გადმოსვენება ცენტრალური ხელისუფლების მიერ კონტროლირებად ტერიტორიაზე და იმ კითხვებზე პასუხის გაცემა, რომელიც ამ საქმესთან დაკავშირებით არსებობს".

სუს-ის ინფორმაციით, ინციდენტების პრევენციისა და მათზე რეაგირების მექანიზმის მორიგი შეხვედრა 2017 წლის 24 იანვარს გაიმართება.