სულ ცოტა ხნის წინ ჟურნალმა TIME-მა 2019 წლის ყველაზე გავლენიან ადამიანად 16 წლის შვედი აქტივისტი, გრეტა თუნბერგი დაასახელა.

ამ ფაქტს ტვიტერის ოფიციალურ ანგარიშზე აშშ-ს ამჟამინდელი პრეზიდენტი, დონალდ ტრამპი გამოეხმაურა:

"რა სასაცილოა. გრეტამ აუცილებლად უნდა იმუშავოს ბრაზის მართვაზე, შემდეგ კი მეგობართან ერთად რამე ძველი ფილმის სანახავად წავიდეს. მოდუნდი, გრეტა, მოდუნდი!"

ტრამპის ამ განცხადებას საერთაშორისო მედიის მხრიდან კრიტიკა მოჰყვა: როგორც ცნობილია, გრეტა თუნბერგს ასპერგერის სინდრომი აქვს, შესაბამისად მის ემოციურებასა და "სიბრაზეზე" ყურადღების გამახვილება, შეურაცხმყოფელი და დამამცირებელია.

გარდა ამ ფაქტისა, ცნობილია, რომ TIME წელს წლის ადამიანების კანდიდატად დონალდ ტრამპსაც განიხილავდა, თუმცა საბოლოო არჩევანი ეკოაქტივისტ მოზარდზე შეაჩერეს, რომელმაც მთელს მსოფლიოში კლიმატის ცვლილების საწინააღმდეგო გაფიცვებს ჩაუყარა საფუძველი.

ამ ფაქტის გამო სოციალურ ქსელებში იმასაც კი წერენ, რომ ამერიკის პრეზიდენტს უბრალოდ შეშურდა გრეტა თუნბერგის და ამიტომაც დაესხა თავს საჯარო პოსტით მას.

გრეტა თუნბერგი და დონალდ ტრამპი ნიუ-იორში გაეროს სამიტზე.

ფოტო: Youtube

თავად გრეტა თუნბერგი აშშ-ს პრეზიდენტის პოსტს ირონიულად შეხვდა და მისი სიტყვები ტვიტერის პირად ანგარიშზე ე.წ. აღწერაში შეიტანა:

"თინეიჯერი, რომელიც ბრაზის მართვის პრობლემაზე მუშაობს. ამ დროისთვის მოდუნებულია და მეგობართან ერთად კარგ ძველ ფილმს უყურებს."

ფოტო: Twitter

დონალდ ტრამპის მიერ გრეტა თუნბერგის შესახებ გამოქვეყნებულ პოსტს ტვიტერის საშუალებით გამოეხმაურა აშშ-ს ყოფილი პირველი ლედი, მიშელ ობამა და შვედ აქტივისტს მხარდაჭერა გამოუცხადა:

"ნურავის მისცემ უფლებას, შენი სიკაშკაშე გააფერმკრთალოს. ვიეტნამსა და მსოფლიოს სხვა კუთხეებში ნანახი გოგოების მსგავსად, შენც ბევრი რამ გაქვს სათქმელი ჩვენთვის. ყურადღებას ნუ მიაქცევ სკეპტიკოსებს და იცოდე, რომ მილიონობით ადამიანი გიჭერს მხარს."