თბილისში ოკუპირებულ ტერიტორიაზე უკანონოდ დაკავებული ვაჟა გაფრინდაშვილის მხარდასაჭერი აქცია გაიმართა. მოქალაქეები თბილისის საკრებულოსთან შეიკრიბნენ. ისინი ვაჟა ექიმის დაუყოვნებლივ გათავისუფლებას და საერთაშორისო საზოგადოების ჩართვას ითხოვენ.

"მაქსიმალურად მშვიდობიანი ფორმით ვაკეთებთ ამ ყველაფერს, რომ არც ბატონი ვაჟა და არც მისი ოჯახი არ დავაზარალოთ, არანაირი აგრესიული ფორმით ეს არ გამოვხატოთ. ძალიან გვინდა, რომ რაც შეიძლება მალე უნდა მოგვარდეს ეს პრობლემა", — განაცხადა აქციის მონაწილემ, მსახიობმა ნანკა კალატოზიშვილმა.

თითქმის ერთი თვეა, რაც ექიმი ვაჟა გაფრინდაშვილი სამხრეთ ოსეთის დე ფაქტო რესპუბლიკაში უკანონო პატიმრობაში იმყოფება. 9-11 ნოემბერს ე.წ. საზღვრის კვეთის ბრალდებით საქართველოს 4 მოქალაქე დააკავეს, მათ შორის ერთ-ერთი გაფრინდაშვილი იყო. დე ფაქტო სასამართლოს გადაწყვეტილებით, დაკავებულთაგან 3 პირს ფულადი ჯარიმა დააკისრეს და ე.წ. რესპუბლიკის ტერიტორია დაატოვებინეს, გაფრინდაშვილი კი დააპატიმრეს, რადგან მან საზღვრის კვეთა არ აღიარა და ამბობდა, რომ საქართველოს ტერიტორიაზეა. საოკუპაციო რეჟიმმა მას ორთვიანი პატიმრობა შეუფარდა.