საოკუპაციო რეჟიმის მიერ უკანონოდ დაკავებული ექიმის, ვაჟა გაფრინდაშვილის ოჯახი ითხოვს, რომ მისი გათავისუფლების საქმეში საერთაშორისო ორგანიზაციები უფრო აქტიურად ჩაერთონ.

"საერთაშორისო ორგანიზაციებმა უფრო მეტად უნდა ამოიღონ ხმა და განიხილონ ვაჟას შემთხვევა არამარტო, როგორც საქართველოს მოქალაქის, არამედ, ევროგაერთიანების ქვეყნის მოქალაქის. ევროსაბჭოში 47 ქვეყანაა. 47-ვე ქვეყანამ უნდა აიმაღლოს ხმა და გაათავისუფლონ უკანონო პატიმარი ციხიდან", — ამის შესახებ გაფრინდაშვილის ცოლმა, თამილა ლაფანაშვილმა რუსთავი 2-თან ისაუბრა.

უკვე 27 დღეა, რაც ექიმი ვაჟა გაფრინდაშვილი სამხრეთ ოსეთის დე ფაქტო რესპუბლიკაში უკანონო პატიმრობაში იმყოფება. 9-11 ნოემბერს ე.წ. საზღვრის კვეთის ბრალდებით საქართველოს 4 მოქალაქე დააკავეს, მათ შორის ერთ-ერთი გაფრინდაშვილი იყო. დე ფაქტო სასამართლოს გადაწყვეტილებით, დაკავებულთაგან 3 პირს ფულადი ჯარიმა დააკისრეს და ე.წ. რესპუბლიკის ტერიტორია დაატოვებინეს, გაფრინდაშვილი კი დააპატიმრეს, რადგან მან საზღვრის კვეთა არ აღიარა და ამბობდა, რომ საქართველოს ტერიტორიაზეა. საოკუპაციო რეჟიმმა მას ორთვიანი პატიმრობა შეუფარდა.