სოფელ ატოცის მკვიდრი იოსებ ზარნაძე იძულებული გახდა თავისი მიწის ნაკვეთი 35 მეტრით უკან დაეწია, რადგან ის საოკუპაციო რეჟიმის მიერ გავლებულ ე.წ. საზღვარს ემიჯნებოდა. ზარნაძე ამბობს, რომ ერთ ჰექტარ მიწას ფლობდა, თუმცა უსაფრთხოების გამო უკან დახევა ამჯობინა და ნაკვეთის 80 მეასედი დარჩა.

"ღობემდე იქნებოდა 15 მეტრი, მაგრამ იქიდან კიდე გადმოვწიე. ახლოს მოდიან ღობეებთან, ცხენებით აივლიან-ჩაივლიან... მეუღლე და ბავშვები ამოდიან აქ, ბავშვს ამოვყევი მეც... რომ დაინახონ, მაინც თავისებურად შეეშინდებათ. შეიძლება არც გადმოვიდნენ მაგრამ, მაინც... უკან როა ნაკვეთი, სხვა არის", — განუცხადა იოსებ ზარნაძემ რადიო თავისუფლებას.

თითქმის ერთი წლის შემდეგ, 19 ოქტომბერს ატოცში უკანონო ბორდერიზაციის პროცესი განახლდა. ამჯერად საოკუპაციო რეჟიმი მათივე ჩადგმულ ბოძებს შორის ღობეებს ავლებს.

სახელმწიფო უსაფრთხოების სამსახურის ინფორმაციით, მომხდარის გამო გააქტიურებულია "ცხელი ხაზი" და ინფორმირებულია ევროკავშირის სადამკვირვებლო მისია. შინაგან საქმეთა მინისტრის, ვახტანგ გომელაურის განცხადებით, ესკალაციის საფრთხე არ არსებობს. მისივე თქმით, ქართული მხარე სიტუაციას სრულად აკონტროლებს.