დამოუკიდებელმა დეპუტატმა ეკა ბესელიამ ჟურნალისტებთან საუბრისას აღნიშნა, რომ ვანო ზარდიაშვილი ბიძინა ივანიშვილმა გადააყენა და თანამდებობა თავისი სურვილით არ დაუტოვებია. ეკა ბესელიას თქმით, მასზე ბევრად ძლიერი ადამიანები უპირისპირდებოდნენ, თუმცა ამ ბრძოლაში გამარჯვებული არცერთი არ ყოფილა.

"გარწმუნებთ, ეს არ არის ადამიანი, რომელსაც აქვს რაიმე ღირსება ან საერთოდ შეუძლია რაიმეზე უარი თქვას, რაც მისთვის კომფორტულია. დააგვიანა [ბიძინა ივანიშვილმა] გადაწყვეტილების მიღება, იმიტომ, რომ მათ უკვე ისეთი ზიანი მიიღეს ამ ადამიანით, ამ ზიანის რეაბილიტირება იქნება შეუძლებელი. რას დაწერს ის განცხადებაში საერთოდ არ მაინტერესებს, ის სხვისი დაწერილი ტექსტია", — თქვა ეკა ბესელიამ.

ყოფილ თანაგუნდელს არ ეთანხმება ვანო ზარდიაშვილი, მისი თქმით მანდატის დატოვება ეკა ბესელიასთან დაპირისპირებას რომ უკავშირდებოდეს, არ წავიდოდა. ზარდიაშვილმა თქვა, რომ ეს გადაწყვეტილება უარგუმენტო კრიტიკის გამო მიიღო. ქართული ოცნების დეპუტატმა პარლამენტი დღეს, 7 ოქტომბერს დატოვა. ეკა ბესელია ამტკიცებს, რომ ის მოსამართლეთა პირველი ათკაციანი სიის გატანას ცდილობდა პარლამენტში. რამდენიმე დღის წინ, 26 სექტემბერს პარლამენტში, სადაც უზენაესის მოსამართლეობის კანდიდატს უსმენდნენ, ბესელიასა და ზარდიაშვილს შორის კონფლიქტი მოხდა. ზარდიაშვილმა მოსამართლეების მოსმენის დროს ახსენა სიტყვები "ბესელიას მორალი", რის გამოც ბესელია მას ხელით შეეხო. მომხდარში ზარდიაშვილი თავის დანაშაულს ვერ ხედავდა და ამტკიცებდა, რომ ეკა ბესელიას წინააღმდეგ კომპრომატები ჰქონდა, რომელსაც საზოგადოებას წარუდგენდა.