საქართველოში მცხოვრებმა რუსეთის მოქალაქეებმა პარლამენტის შენობასთან სოლიდარობის აქცია გამართეს. მათი თქმით, ანტისაოკუპაციო აქციას მხარს უჭერენ და ღიად ამბობენ, რომ რუსეთი ოკუპანტია.

"ღიად ვაცხადებ, რომ რუსეთი ოკუპანტია და საქართველოს ოცი პროცენტი ოკუპირებულია. საქართველოს გარდა რუსეთმა მოახდინა უკრაინის ნაწილის ოკუპაციაც. მე თავისუფალ საქართველოს ვუჭერ მხარს. 2 წელია აქ ვცხოვრობ და თავს ვგრძნობ თავისუფლად. აქ არანაირი რუსოფობიური აქციები არ მიმდინარეობს. ხალხი იბრძვის თავისი უფლებებისთვის", — ამბობს აქციის ერთ-ერთი მონაწილე რუსთავი 2-თან.

აქციის მონაწილეებს თან ჰქონდათ ბანერები: "დაიღალე პუტინით? გაატარე ზაფხული საქართველოში", "ჩვენ არ ვართ გავრილოვები", "პუტინი ოკუპანტია".

პარლამენტთან ანტიოკუპაციური აქცია #სირცხვილია უკვე 27-ე დღეა მიმდინარეობს. პროტესტი საქართველოში რუსეთის დუმის კომუნისტი დეპუტატის, სერგეი გავრილოვის ვიზიტსა და პარლამენტის სავარძელში დაჯდომას მოჰყვა. ამის გასაპროტესტებლად პარლამენტთან აქცია გაიმართა, რომელიც პოლიციასთან დაპირისპირებაში გადაიზარდა. 20-21 ივნისის ღამეს სპეცრაზმმა აქცია ძალის გადამეტებით დაშალა. შედეგად დაშავდა ასეულობით და დასახიჩრდა ათეულობით ადამიანი. მეორე დღიდან დემონსტრანტები შს მინისტრის, გიორგი გახარიას პასუხისმგებლობის გადაყენებას ითხოვენ, თუმცა ის გადადგომაზე უარს ამბობს, რასაც მმართველი გუნდიც უჭერს მხარს.