თავისუფალი დემოკრატების ლიდერი, ირაკლი ალასანია ე.წ. სამშვიდობო მემორანდუმთან დაკავშირებით განმარტავს, რომ დოკუმენტში არ წერია, რა პასუხისმგებლობა აქვს მმართველ გუნდს პროცესების მშვიდობიან მართვაზე. თუმცა, ის ასევე განმარტავს, რომ თავისუფალი დემოკრატები აღნიშნულ მემორანდუმს ხელს მოაწერენ:

"ჩვენ თვითონ ვიყავით პარლამენტში ამგვარი დეკლარაციის ინიციატორები. ის უფრო ყოვლისმომცველი იყო. ბუნებრივია, არავის რომ სალაპარაკო არ ჰქონდეს, პირველ რიგში, კიდევ შევახსენოთ ხელისუფლებაში მყოფ პარტიას, რომ მათი ვალდებულებაა დაიცვან წესრიგი და სამართლიანად ჩატარდეს არჩევნები".

დღეს პარტია ქართული ოცნების აღმასრულებელმა მდივანმა, ირაკლი კობახიძემ, 8 ოქტომბრის პარლამენტის არჩევნებისთვის საარჩევნო აგიტაციის დროს კონტრაქციების თაობაზე ე.წ. სამშვიდობო მემორანდუმის ტექსტი გაასაჯაროვა.

21 სექტემბერს, სპეციალურად გამართულ ბრიფინგზე, კობახიძემ განმარტა, რომ მემორანდუმის ტექსტი არჩევნებში მონაწილე პარტიებს დღესვე გადაეგზავნებათ და მმართველი გუნდი მათ გამოხმაურებას დაელოდება.

დღესვე რესპუბლიკელების ლიდერმა, დავით უსუფაშვილმა მემორანდუმის ტექსტი ამობეჭდა და მას მედიის წარმომადგენლების თვალწინ მოაწერა ხელი.

რაც შეეხება ერთიან ნაციონალურ მოძრაობას, ის აღნიშნულ დოკუმენტზე ხელის მოწერას არ აპირებს.