დეპუტატმა კობა ნარჩემაშვილმა საპარლამენტო უმრავლესობა უკვე დატოვა. შესაბამისს მიმართვას, ფრაქცია ქართული ოცნება — სოციალ-დემოკრატებიდან გასვლის შესახებ დღეს, 11 მარტს ბიუროს სხდომაზე დაუჭირეს მხარი.

კობა ნარჩემაშვილმა TV პირველზე საუბრისას თქვა, რომ მაჟორიტარია და აქვს ვალდებულებები, როგორც ამომრჩეველთან, ისე შესაბამის ოლქთან. მისივე განმარტებით, ჯერჯერობით, საპარლამენტო საქმიანობას გაარძელებს, როგორც დამოუკიდებელი დეპუტატი.

სოციალ-დემოკრატების ლიდერმა გია ჟორჟოლიანმა და ამავე ფრაქციის წევრმა მირიან წიკლაურმა უმრავლესობა 4 მარტს დატოვეს. ისინი პატრიოტთა ალიანსთან ერთად აგრძელებენ საპარლამენტო საქმიანობას.

პარტია ქართული ოცნება და ფრაქცია 27 თებერვალს დატოვა დეპუტატმა ზვიად კვაჭანტირაძემ. მანამდე მოსამართლეების საკითხის გამო ქართული ოცნება დატოვეს ეკა ბესელიამ, გედევან ფოფხაძემ და ლევან გოგიჩაიშვილმა. მმართველი პარტია დატოვა ბექა ნაცვლიშვილმაც, მაგრამ განსხვავებული მიზეზით. მან ამ ფორმით გააპროტესტა ის, რომ პარლამენტმა დაგროვებით პენსიაზე მის კანონპროექტს მხარი არ დაუჭირა.

მმართველი პარტიიდან დეპუტატების წასვლის შემდეგ ქართულმა ოცნებამ საკონსტიტუციო უმრავლესობა დაკარგა.

ამავე თემაზე: