ქართული ოცნების დეპუტატი ეკა ბესელია ტელეკომპანია იმედთან სატელეფონო ინტერვიუში ადასტურებს რომ თანამდებობის დატოვებაზე პარლამენტის თავმჯდომარესთან კომუნიკაცია აგვისტოში ჰქონდა.

"მას [ირაკლი კობახიძეს], ზარდიაშვილსაც და ალბათ, კიდევ სხვასაც სურდათ იურიდიულ კომიტეტში არ ვყოფილიყავი, სამწუხაროდ, ეს ასე იყო. მე არ ვაპირებდი ამ კომიტეტის დატოვებას. თუ ეს ახსენეს საჯაროდ, ამაზე საუბარი მაშინაც სასამართლოს პროცესებს უკავშირდებოდა".

ეკა ბესელიას განცხადებით, პარტიის დღევანდელი გადაწყვეტილება, გედევან ფოფხაძის იურიდიული კომიტეტიდან გაწვევაზე "სადამსჯელო გადაწყვეტილებაა". მისივე მტკიცებით, ფოფხაძე კომიტეტის თავმჯდომარის პირველ მოადგილედ პროცედურების დაცვით აირჩიეს:

"ბევრად უფრო ადრე იყო საუბარი გედი ფოფხაძის გადმოყვანაზე პირველ მოადგილედ, ვანო ზარდიაშილის ნაცვლად და მე ეს საკითხი მქონდა შეთანხმებული პარტიის თავჯდომარე [ბიძინა ივანიშვილთან] თვეების წინ და ეს საკითხი ძალიან გაიწელა".

დღეს, 3 იანვარს მმართველი გუნდის წევრები პარტიის დამფუძნებელსა და თავმჯდომარეს, ბიძინა ივანიშვილს შეხვდნენ. შეხვედრის შემდეგ ცნობილი გახდა, რომ ქართულმა ოცნებამ გედევან ფოფხაძე იურიდიულ საკითხთა კომიტეტიდან გაიწვია.

პარლამენტის დეპუტატის, მამუკა მდინარაძის განცხადებით, გედევან ფოფხაძე იურიდიულ საკითხთან კომიტეტიდან ორი მიზეზით გაიწვიეს — პროცედურული დარღვევები და შეუთანხმებელი კანდიდატურა.

მდინარაძის განმარტებით, ფოფხაძე კომიტეტის პირველ მოადგილედ რეგლამენტის დარღვევით აირჩიეს, გარდა ამისა მისი კანდიდატურა ფრაქციასთან შეუთანხმებელი იყო. როგორც მან ჟურნალისტებს განუცხადა, გადაწყვეტილებას მხარი მმართველი გუნდის უმრავლესობამ დაუჭირა მხარი და წინააღმდეგ მხოლოდ სამი პირი იყო.

რაც შეეხება გუნდის გარეთ განსხვავებული აზრის გამოთქმას, მდინარაძის განმარტებით განსხვავებული აზრის გამოთქმის გამო სანქციები არავის დაეკისრება:

"ეს სანქციაც კი არ არის, ჩვენ გამოვნახეთ ყველაზე რბილი ფორმა, რაც შეიძლებოდა ამ შემთხვევაში გამონახულიყო იმის საპასუხოდ, რომ გუნდში გედევან ფოფხაძის მოადგილეობა არ იყო შეთანხმებული... მეორეხარისხოვნადაც კი არის, რომ პროცედურული დარღვევებით მოხდა მისი არჩევა, თუმცა ასეთი პრეცენდენტის დაშვება არის ძალიან ცუდი".

დაპირისპირება ქართულ ოცნებაში

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი წარადგინა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

იურიდიულ საკითხთა კომიტეტის პირველ მოადგილედ გედევან ფოფხაძე 31 დეკემბერს აირჩიეს. საქართველოს პარლამენტის თავმჯდომარე ფიქროს, რომ მისი არჩევა რეგლამენტის დარღვევით მოხდა. ეკა ბესელიას თქმით, რეგლამენტს კარგად იცნობს და იმოქმედა წესების შესაბამისად.

ამასთანავე პარლამენტის თავმჯდომარემ განაცხადა, რომ თუ ვინმე წავა ქართული ოცნების გუნდის წინააღმდეგ, ამას პასუხი აუცილებლად გაეცემა.

ამავე თემაზე: