Facebook-ის თამაშები მსოფლიოში დღემდე პოპულარულია. არსებობს იუზერების კატეგორია, რომელიც ამ სოციალურ ქსელს მხოლოდ სათამაშოდ იყენებს და დღემდე, ბევრი თქვენგანი სხვადასხვა მოსაწვევებსაც იღებს ასეთი მეგობრებისგან, რომლებიც თამაშში ჩართვას და თქვენთვის და თავისთვის გარკვეული ბონუსების მიღებას გთავაზობენ.

თუმცა მარკ ცუკერბერგი და მისი გუნდი მხოლოდ Farmville-ზე გაჩერებას არ აპირებენ. მათ სურთ, რომ ე.წ. საოფისე თამაშების პლატფორმიდან უფრო სერიოზულ გეიმინგზე გადავიდნენ და ასპარეზი იმ დეველოპერებს დაუთმონ, რომლებიც ვირტუალურ რეალობაზე მორგებულ თამაშებს შექმნიან.

2014 წლის ზაფხულში Facebook-მა Oculus VR $2 მილიარდად შეიძინა. ცხადია, ეს ინვესტიცია ტყუილად არ გაკეთებულა, ამ ბიზნეს გარიგებამ Facebook-ის მფლობელებს მოგება უნდა მოუტანოს. ოკულუსისთვის შექმნილი პროდუქტის გასაყიდად კი საუკეთესო ბაზარი ისევ ფეისბუკია, რომელზეც, ბოლო მონაცემებით, 1,59 მილიარდი ადამიანია დარეგისტრირებული. პროდუქტის ბაზრამდე მიტანა კი სწორედ აქედან შეიძლება ყველაზე ეფექტიანად.

თამაშების შექმნა ნებისმიერ დეველოპერს შეუძლია, ერთადერთი მოთხოვნა ისაა, რომ მათ Unity-ს ძრავი უნდა გამოიყენონ. Facebook-მა უკვე დაიწყო დეველოპერების აპლიკაციების მიღება ძრავის ბეტა ვერსიის გამოყენების თაობაზე.