მსოფლიოში ცნობილი თამაში, რომელმაც უამრავი ადამიანი კომპიუტერებს მიაჯაჭვა, მომავალი კვირიდან ოკულუს რიფტზეც იქნება ხელმისაწვდომი. როგორც Mojang-ის დეველოპერი, ტომასო ჩეჩი ამბობს, ოკულუს რიფტზე თავსებადი განახლება მომავალ კვირას გამოვა.

ეს იქნება ბეტა ვერსია (0.15.6 ვერსია), რომელიც დეველოპერებს უკვე კარგად აქვთ დატესტილი და, როგორც ისინი ამბობენ, 3D ფორმატში, 360 გრადუსიან გაფართოებაზე თამაში კიდევ უფრო მომხიბვლელია.

ამ დროისთვის, Microsoft Mojang-თან თანამშრომლობით, Windows 10 Beta Version-ს თავის მომხმარებელს სრულიად უფასოდ აწვდის. ამისათვის საჭიროა მხოლოდ საიტზე შესვლა და თქვენი მონაცემების მითითება. Engadget-ის ჟურნალისტები ფიქრობენ, რომ მათთვის ვისაც უკვე აქვს Minecraft-ის ანგარიში, ოკულუს რიფტის ვერსიის გადმოწერა მომავალშიც უფასო იქნება, თუმცა Microsoft-ს ეს ინფორმაცია არ დაუდასტურებია.

Minecraft-ის შემქმნელებს ოთხი წლის წინ გაუჩნდათ ოკულუს რიფტის ვერსიის შექმნის იდეა, თუმცა მოგვიანებით პროექტი გაჩერდა, მას შემდეგ რაც, ოკულუსი Facebook-მა შეიძინა. შემქმნელები უარს ამბობდნენ ცუკერბერგის კომპანიასთან თანამშრომლობაზე. მოგვიანებით, Microsoft-მა, ეს პროექტი, Mojang-ის $2,5 მილიარდად შეძენის შემდეგ აღადგინა. საბოლოო ჯამში, ყველაფერი უკან დარჩა, Minecraft-ერები კი მოუთმენლად ელოდებიან ოკულუს რიფტზე თამაშის დაწყებას.