"არც ჩვენი გადაცემა დაშლილა და არც ჩვენი დუეტი, გავრცელებული ინფორმაცია არასწორია", - ამის შესახებ On.ge-ს ხარისხის არხის, გადაცემა "დასაბამიდან სასუფევლამდე" ავტორმა და წამყვანმა, გიორგი ასათიანმა განუცხადა.

"დათო [მისი თანაწამყვანი] ერთი წელი მაინც ყოფილა სხვა ქალაქში. მარტოც მიმყავდა ხოლმე მაშინ. ახლა რა დაემართათ ვერ გავიგე", - ამბობს ასათიანი.

მისი თქმით, გადაცემამ ფორმატი ნაწილობრივ შეიცვალა და ახლა მაყურებელს პროგრამის ნახვა თვეში ოთხის ნაცვლად შვიდჯერ შეეძლება. ის ამბობს, რომ ის და თავის თანაწამყვანი, დავით (ედიშერ) გიორგობიანი გადაცემას თვეში ერთხელ ერთად გაუძღვებიან, სხვა შემთხვევაში კი ცალ-ცალკე წაიყვანენ პროგრამას.

"მთავარი მიზეზია ზარები, რაც ჩვენს ეთერში შემოდიოდა. ვიცით ვინ აკეთებს ამ ყველაფერს, ერთმანეთს უკავშირდებიან და ზარებით დაისაკუთრეს [ეთერი]. ფეიკზარები არის და ცდილობენ იმიჯი შეუცვალონ გადაცემას", - ამბობს ასათიანი.

მისი თქმით, ამ პრობლემის გადასაჭრელად მათ ორი გზა ჰქონდათ, ან ზარები შეეზღუდათ, ან გაეფილტრათ სატელეფონო ზარები. თუმცა იფიქრეს, რომ ამით გადაცემაში თავისუფალი აზრი იკარგებოდა.

"გადავწყვიტე, მე მარტო გავუმკლავდე ზარებს, დათო რელიგიურ თემებზე წაიყვანს და ნაკლებ ზარებს შემოუშვებს. ეგ იყო მიზეზი [გადაცემის ცალ-ცალკე წაყვანის] მეტი არაფერი. სტუმრიანობა იქნება უფრო მეტი. რელიგიურ თემებზე მღვდლები უფრო ილაპარაკებენ, ვიდრე ჩვენ, რომ არ მოხდეს გაუგებრობა", - განაცხადა გადაცემა "დასაბამიდან სასუფევლამდეს" ერთ-ერთმა წამყვანმა.

ონლაინმედიაში გადაცემის დუეტის დაშლის შესახებ მას შემდეგ გავრცელდა ინფორმაცია, რაც წამყვანებმა ფორმატის ცვლილება დაანონსეს. როგორც ასათიანი ამბობს, შეცვლილი ფორმატით გადაცემა დაახლოებით სამი კვირაა ეთერშია.