დღეს, 10 ივლისს ერგნეთში ინციდენტების პრევენციისა და მათზე რეაგირების მორიგი შეხვედრა იწყება. ადგილზე უკვე მივიდა სახელმწიფო უსაფრთხოების სამსახურის ანალიტიკური დეპარტამენტის უფროსის მოადგილე, ირაკლი ანთაზე. მისი თქმით, შეხვედრაზე განიხილავენ არჩილ ტატუნაშვილის წამების, მკვლელობისა და ასევე გაურკვეველ ვითარებაში გარდაცვლილი დავით ბაშარულის საქმეებს. სუს-ის წარმომადგენლის თქმით, შეხვედრაზე კიდევ ერთხელ დააყენებენ ახალგორის რაიონში სამოქალაქო აქტივისტის, თამარ მეარაყიშვილის უკანონო დევნის საკითხს:

"ჩვენ მზად ვართ კონსტრუქციული დიალოგისთვის, მათ შორის მტკივნეულ საკითხებზე სასაუბროდ. რა თქმა უნდა არსებობს წითელი ხაზები, არსებობს კონსოლიდირებული პოზიცია".

რადიო თავისუფლების ჟურნალისტის კითხვაზე, წარმოადგინეს თუ არა დღევანდელ შეხვედრაზე ტატუნაშვილის სხეულის ექსპერტიზის ნოტარიულად დამოწმებული თარგმნილი დოკუმენტი, სუს-ის წარმომადგენელმა თქვა, რომ ქართულმა მხარემ მათ ყველა დოკუმენტი გაუზიარა და ეს საკითხი მოხსნილია.

წინა შეხვედრაზე, რომელიც 7 ივნისს გაიმართა, ქართულ მხარეს ტატუნაშვილის ექსპერტიზის დასკვნა მატერიალური სახით არ გადაუცია. კითხვაზე, აპირებდნენ თუ არა ექსპერტიზის თარგმნილი დოკუმენტის გადაცემას, ირაკლი ანთაძემ მაშინ ამ კითხვას არ უპასუხა. სუსის წარმომადგენელის თქმით, ქართულმა მხარემ ტატუნაშვილის ორგანოების გადმოცემა კატეგორიულად მოითხოვა, თუმცა მოლაპარაკების მეორე მხარემ მოთხოვნა უპასუხოდ დატოვა.