დღეს, 29 ივნისს, სვანეთი ჰიდროს მხარდაჭერით, რომელიც სვანეთში მესტიაჭალა ჰესს აშენებს, ახალ პროექტს ჩაეყარა საფუძველი, კერძოდ შეზღუდული შესაძლებლობის პირთათვის სარეაბილიტაციო ცენტრის მშენებლობა დაიწყო. ცენტრის მიზანია შეზღუდული შესაძლებლობის მქონე პირებსა და მათ ოჯახებს მიაწოდოს მათთვის საჭირო სერვისები.

"პირველ ეტაპზე სარეაბილიტაციო ცენტრი 150 ბენეფიციარს მოემსახურება. აღსანიშნავია, რომ მსგავსი ტიპის ცენტრი მესტიაში პირველად შენდება და პროგრამები ადგილობრივი მოსახლეობის საჭიროებების მიხედვით შეიქმნა. პროექტში 65 000 ლარზე მეტის ინვესტიციას ვახორციელებთ", - განაცხადა კომპანია სვანეთი ჰიდროს საინფორმაციო ცენტრის ხელმძღვანელმა სოფიო ნატროშვილმა.

პროექტის კოორდინატორის, ნანა ლომიძის თქმით, მაღალმთიან რეგიონებში გონივრულად მისადაგებული სოციალური სერვისების შექმნა არის ძალიან მნიშვნელოვანი და აუცილებელია.

"ამ პროექტს საფუძველი ჩაუყარა კომპანია სვანეთი ჰიდრომ და ეს არის მთლიანად მესტიის თემზე, მათ საჭიროებებზე მორგებული სერვისი, რომელიც დღემდე მესტიაში არ არსებობდა. შემოდგომისთვის მესტიის მოსახლეობას ექნება საშუალება მაღალ პროფესიული კადრებით დაკომპლექტებული ცენტრით და ევროპული სტანდარტის მომსახურებით ისარგებლონ", - განაცხადა ნანა ლომაძემ.

დაბა მესტიის მკვიდრი, მზია ნიგაური შეზღუდული შესაძლებლობის მქონე ბავშვის დედაა. მზია ამბობს, რომ მესტიაში სარეაბილიტაციო ცენტრის მშენებლობა პირადად მისთვის არის ძალიან მნიშვნელოვანი.

"ბავშვი თითქმის, 2 თვეში ერთხელ მსგავსი ტიპის ცენტრში თბილისში დამყავდა. ეს, რა თქმა უნდა, სხვადასხვა სირთულეებთან არის დაკავშირებული. ყოველთვის ვერც ვახერხებდით დედაქალაქში გამგზავრებას. მესტიაში ისეთი ოჯახებიც არსებობს, რომლებიც საერთოდ ვერ დადიან თბილისში. ამ ცენტრის მშენებლობის დასრულების შემდეგ მესტიის მოსახლეობა ადგილზე მივიღებთ იმავე სერვისს - ეს არის ძალიან საჭირო საქმე და დიდი მხარდაჭერა", - აღნიშნა მზია ნიგურიანმა.

ფოტო: სვანეთი ჰიდრო

კომპანია სვანეთი ჰიდრო ადგილობრივი მოსახლოების მხარდასაჭერად და გასაძლიერებლად სხვადასხვა მიმართულების სოციალურ პროექტებზე მუშაობს, მათ შორის მნიშვნელოვანია განათლების, სპორტისა და ტურიზმის ხელშეწყობა. სვანეთი ჰიდრომ მესტიის მოსახლეობის მხარდასაჭერად ამ დრომდე ერთ მილიონ ლარზე მეტი სოციალური და ინფრასტრუქტურული პროექტები განახორციელა.