ამერიკის შეერთებული შტატებისა და გვატემალას მსგავსად, მაისის ბოლოს პარაგვაის საელჩო იერუსალიმში გაიხსნება. ამის შესახებ ინფორმაციას Reuters ავრცელებს. როგორ ცნობილია, საელჩოს გახსნისთვის იერუსალიმში პარაგვაის პრეზიდენტიც ჩავა.

აშშ-მა თელ-ავივიდან იერუსალიმში საელჩოს გადატანა მას შემდეგ გადაწყვიტა, რაც ქვეყნის პრეზიდენტმა, დონალდ ტრამპმა ქალაქი ისრაელის დედაქალაქად აღიარა. საელჩო 14 მაისს გაიხსნება. აშშ-ის მსგავსად იერუსალიმში საელჩოს გადატანა გადაწყვიტა გვატემალამაც.

აშშ-ის ამ გადაწყვეტილებამ მუსლიმური ქვეყნები გააღიზიანა. ისლამური თანამშრომლობის ორგანიზაციამ, რომელშიც 57 მუსლიმური ქვეყანა არის გაერთიანებული, იერუსალიმი პალესტინის დედაქალაქად გამოაცხადა.

21 დეკემბერს, გაერთიანებული ერების ორგანიზაციამ აშშ-ის პრეზიდენტ დონალდ ტრამპის გადაწყვეტილება იერუსალიმის ისრაელის დედაქალაქად აღიარების შესახებ დაგმო, 128 ხმით 9-ის წინააღმდეგ. ხოლო, 35-მა სახელმწიფომ, როგორიცაა კანადა, მექსიკა და ავსტრალია კენჭისყრაში მონაწილეობა არ მიიღო. თავი შეიკავა საქართველომაც.