კომპანია Apple საკუთარ საიდუმლო ქარხანაში ახალი ტექნოლოგიის გამოყენებით გაუმჯობესებული ეკრანის შექმნაზე მუშაობს. ამის შესახებ ინფორმაციას Bloomberg ავრცელებს.

ტექნოლოგია MicroLED გარკვეული ნიშნებით OLED-ს ჰგავს (არც ერთ მათგანს არ ესაჭიროება ფონური განათება და ორივეს უკეთესი კონტრასტი აქვს, ვიდრე LCD-ს), თუმცა MicroLED ტექნოლოგიით დამზადებული ეკრანები უფრო თხელი და ნათელია, იყენებს ნაკლებ ენერგიას და OLED ეკრანებზე უფრო გამძლეა. MicroLED-ის წარმოება გარკვეულ სირთულეებთან იყო დაკავშირებული, რის გამოც მისი კომერციალიზაცია აქამდე არ მომხდარა.

ცნობა იმის შესახებ, რომ ეფლი ახალი ტექნოლოგიის ეკრანების შექმნას აპირებს, ახალი არაა. 2014 წელს ეფლმა სპეციალურად ამ მიზნისთვის შეიძინა კომპანია LuxVue. მაშინ ხმები გავრცელდა, რომ Apple-ის ჭკვიან საათს MicroLED ეკრანი ექნებოდა, თუმცა საბოლოოდ არჩევანი მაინც OLED-ზე გაკეთდა.

მიმომხილველები თვლიან, რომ Apple-ის მიერ საკუთარი ეკრანების წარმოების დაწყება მნიშვნელოვნად დააზარალებს ამ სფეროში მომუშავე აზიურ გიგანტებს, რომლებიც აქამდე iPhone X-ის, Apple Watch-ისა და სხვა პროდუქტებისთვის ეკრანებს აწარმოებდნენ (Samsung, LG Display და ა.შ).

პირველი პროდუქტი, რომლისთვისაც ეფლი ახალ ტექნოლოგიას გამოიყენებს, სწორედ Apple Watch იქნება, თუმცა, შესაძლოა, ამ სიახლის ხილვამდე რამდენიმე წელი გავიდეს.

პარალელურად, სამსუნგიც არ არის უქმად. კომპანიამ MicroLED ეკრანის მქონე ტელევიზორის პროტოტიპი იანვარში წარადგინა და მის მასობრივად გამოშვებას 2018 წლის დასასრულისთვის აპირებს.