პარლამენტის თავმჯდომარემ, ირაკლი კობახიძემ ქრისტეს შობისადმი მიძღვნილი ლიტურგიის დასრულების შემდეგ განაცხადა, რომ პატრიარქმა ისეთ მნიშვნელოვან საკითხებზე გაამახვილა ყურადღება ეპისტოლეში, რაზეც პარლამენტი მუშაობს:

"გზავნილები, რომლებიც იყო გაჟღერებული ეპისტოლეში, იქნება ჩვენთვის ყურადსაღები და გათვალისწინებული მუშაობის პროცესში. მათ შორის, საუბარი იყო დემოგრაფიაზე, ნარკოპოლიტიკაზე".

საშობაო წირვას ირაკლი კობახიძესთან და დეპუტატებთან ერთად, საქართველოს პრემიერ-მინისტრი გიორგი კვირიკაშვილი, პრეზიდენტი გიორგი მარგველაშვილი, თბილისის მერი კახა კალაძე და მთავრობის წევრები დაესწრნენ.

საქართველოს მართლმადიდებელი ეკლესიის პატრიარქი, ილია მეორე მიიჩნევს, რომ ნარკოპოლიტიკამ "ამ უმძიმეს სენთან მიმართებით" უარყოფითი განწყობა უნდა შექმნას და ახალგაზრდები დაიცვას.

"მაშინ, როდესაც ქვეყანა დემოგრაფიული კატასრტროფის წინაშე დგას, ყველას განსაკუთრებული სიფრთხილე და წინდახედულება გვმართებს, რათა აღნიშნული პრობლემისადმი სწორი კომპლექსური მიდგომა განხორციელდეს და რეალური, შედეგის მომტანი ნაბიჯები გადაიდგას", - წერია საშობაო ეპისტოლეში.