Apple-მა ოფიციალურად აღიარა, რომ, ახალი ოპერაციული სისტემა და iOS-ის სხვადასხვა ვერსიები ძველი მოდელის iPhone-ბის მუშაობის სიჩქარეს ანელებს.

კომპანიის ოფიციალურ წერილში, რომელიც TechChurch-მა გამოაქვეყნა, ნათქვამია, რომ ამის მიზანი ძველი მოდელების ელემენტების გამძლეობის და მუშაობის ხანგრძლივობის შენარჩუნებაა.

ეფლის ცნობით, ეს ფუნქცია გამოიყენებოდა iPhone 6, 6S, iPhone SE-ის შემთხვევაშიც. ასევე, ახალი iOS 11.2 გამოსვლის შემდეგ, ეს ტექნოლოგია ამუშავდა iPhone 7-ის შემთხვევაშიც.

კომპანიის განმარტებით, ფუნქცია მხოლოდ გადაუდებელი აუცილებლობის შემთხვევაში აქტიურდება, რათა მუშაობის პროცესის უცრად არ დასრულდეს და მოწყობილობა არ გაითიშოს. დროთა განმავლობაში, ლითიუმ-იონის ელემენტები, რომლებიც აიფონში გამოიყენება, ცვდება და ისინი გამძლეობას კარგავენ, რის გამოც მოწყობილობა შეიძლება უეცრად გაითიშოს მაღალ სიცხესა და სიცივეში.

წინა თვეებში, თემა აქტიურად განიხილებოდა reddit-ზე. როგორც მომხმარებლები აღნიშნავდნენ, ოპერაციული სისტემის ახალი ვერსიის დაყენებისთანავე, მათი სმარტფონები საგრძნობლად კარგავდნენ სიჩქარეს, თუმცა ელემენტის გამოცვლის შემდეგ, ტელეფონი ისევ ძველ სიჩქარეზე იწყებდა მუშაობას.

აღნიშნული პრობლემა არაერთ ვებ პორტალზე გამხდარა განხილვის და ეჭვების საგანი, თუმცა ეფლის მხრიდან ეს პირველი ოფიციალური პასუხი იყო.

ინფორმაციის გავრცელების შემდეგ, მომხმარებლების დიდი ნაწილი მიიჩნევს, რომ ეს კომპანიის მხრიდან ერთგვარი მარკეტინგული სვლაა, რითაც ეფლი უფრო მეტი ახალი მოდელის აიფონის გაყიდვას ცდილობს.