აფხაზეთის დე-ფაქტო საგარეო საქმეთა სამინისტროს მოადგილის, კანა ტანიას განცხადებით, იტალიაში რესპუბლიკის დიპლომატიური წარმომადგენლობა დაარეგისტრირეს:

"უნდა აღინიშნოს, რომ წარმომადგენლობას არ აქვს დიპლომატიური ფუნქცია, რადგან იტალია აფხაზეთის დამოუკიდებლობას არ აღიარებს. წარმომადგენლობის ძირითადი ფუნქცია იქნება ევროპაში აფხაზეთის რესპუბლიკის მოქალაქეების დაცვა, იტალიელი და აფხაზი ხალხის დაახლოება, აფხაზეთის იმიჯის, ენის, კულტურისა და ტრადიციების წინ წამოწევა".

დე-ფაქტო სამინისტროს პრესსამსახურის თქმით, ქალაქ ბარიში გაიმართა პრესსკონფერენცია, სადაც ტანია საუბრობს აფხაზეთის პოლიტიკურ სტატუსზე, ეკონომიკასა და რეგიონის ტურისტულ მიმზიდველობაზე.

ოქტომბერში, ოკუპირებული სამხრეთ ოსეთის საგარეო საქმეთა სამინისტრომ განაცხადა, რომ ბარსელონაში წარმომადგენლობითი ოფისი გახსნა.

ბარსელონაში საქართველოს ვიცე-კონსულმა ლიკა ახალბედაშვილმა On.ge-ს უთხრა, რომ განცხადების გავრცელებისთანავე მათ ინფორმაციის გადამოწმება დაიწყეს, რის შედეგადაც გაირკვა, რომ სამხრეთ ოსეთის ე.წ. საგარეო საქმეთა სამინისტროს წარმომადგენლების შეხვედრა ესპანეთის უწყებებთან ან ოფიციალურ პირებთან არ ყოფილა.

"თავადვე ამბობენ, რომ ოსი ეროვნების თანამემამულეებს შეხვდნენ. ცალსახაა ეს არ იყო ვიზიტი, როგორც თავად ცდილობენ გაასაღონ, არამედ ეს იყო კერძო პირის კერძო მოგზაურობა", - ამბობს ახალბედაშვილი.