მოსამართლე ალექსანდრე გოგუაძემ აჭარის ტელევიზიის ჟურნალისტი კობა ფარტენაძე ადმინისტრაციულ სამართალდამრღვევად ცნო და 2000 ლარით დააჯარიმა. ინფორმაციას "აჭარა თაიმსი" ავრცელებს.

ფარტენაძემ "აჭარა თაიმსთან" საუბრისას აღნიშნა, რომ სასჯელის აღნიშნული ზომა მინიმალური იყო და მოსამართლემ სამართლიანი გადაწყვეტილება მიიღო. ჟურნალისტის განმარტებით, მისი გაღიზიანება წინა საქმეებზე არაადეკვატურად დასჯილმა ადამიანებმა გამოიწვიეს.

"ძალიან კარგი გადაწყვეტილებაა იმ მხრივ, რომ ვაცნობიერებ ჩემს გადაცდომას, ჩემს ღირსებას საზოგადოების წინაშე ეს ნამდვილად შეესაბამებოდა, იმიტომ რომ ხალხი სხვანაირად მიცნობს, მენდობა, მიყურებს, ელოდება... ამიტომაც ვფიქრობ, რომ ეს იყო სასჯელის სახით ყველაზე მინიმალური, კიდევ ერთხელ აღვნიშნავ, რომელიც იყო მოსამართლის მიერ სამართლიანად მიღებული.

წინა საქმეებზე არაადეკვატურად დასჯილი ადამიანების გამო იყო ნაწილობრივ ჩემი გაღიზიანება, ამიტომაც მე ვფიქრობ, რომ ან უნდა გადაიხედოს მათი საქმეები, რადგან ძალიან დაბალია ჯარიმა, დაბალი დანაშაულის მიენიჭათ, და შესაბამისად ძალიან გამიხარდება, თუ ნებისმიერი საქმე, რომელიც დააზარალებს სხვა ადამიანს, ამ შემთხვევაში მე ვარ დაზარალებული ძალიან ბევრ საქმეზე, იქნება სამართლიანად გამოძიებული, ისევე როგორც, მაგალითად, ჩემს შემთხვევაში დღეს მოხდა", — თქვა კობა ფარტენაძემ.

"აჭარა თაიმსს" ესაუბრა ფარტენაძის ადვოკატი თემურ ქავშბაიაც. მან აღნიშნა, რომ შსს ისედაც ამ ოდენობით ითხოვდა ფარტენაძის დაჯარიმებას. მისივე განმარტებით, სასამართლომ საკმაოდ მკაცრი გადაწყვეტილება მიიღო იმ ფონზე, როდესაც სიტყვიერი გაფრთხილებით ან შენიშვნით შეიძლებოდა შემოფარგლულიყო.

"შინაგან საქმეთა სამინისტრო ისედაც ამ ოდენობით ითხოვდა ბატონი კობას დაჯარიმებას. მე ვფიქრობდი, რომ სასამართლო უფრო ლოიალური იქნებოდა და შემოიფარგლებოდა სიტყვიერი გაფრთხილებით, შენიშვნით, მათ შორის, რისი ლეგიტიმური უფლებაც გააჩნდა სასამართლოს.

მე ვფიქრობ, რომ კობას მიმართ საკმაოდ მკაცრი გადაწყვეტილება იყო — დააჯარიმა 2 000 ლარის ოდენობით, სხვა ალტერნატიული შესაძლებლობები არსებობდა, თუმცა სასამართლომ არ გამოიყენა", — თქვა უფლებადამცველმა.

შეგახსენებთ, 17 აგვისტოს, აჭარის ტელევიზიის ჟურნალისტი კობა ფარტენაძე ადმინისტრაციული წესით წვრილმანი ხულიგნობისა და პოლიციის კანონიერი მოთხოვნისადმი დაუმორჩილებლობის მუხლებით დააკავეს.

ცნობისთვის, 16 აგვისტოს მეტეოროლოგ კობა ფარტენაძეს, ბათუმში, ევროპის მოედანზე, კვლავ დაესხნენ თავს. მანამდე, აჭარის საზოგადოებრივი მაუწყებლის ჟურნალისტმა და მეტეოროლოგმა, კობა ფარტენაძემ, სოციალურ ქსელში ვიდეო გაავრცელა, სადაც ისმის, თუ როგორ ემუქრება უცნობი კაცი. ბათუმის საქალაქო სასამართლომ კობა ფარტენაძის მიმართ განხორციელებულ დაჭრის მუქარასა და ძალადობაში ბრალდებულ ორ პირს 7 000-7 000-ლარიანი გირაო შეუფარდა.