ერთიანი ნაციონალური მოძრაობის ყრილობაზე დროებითი მმართველობითი საბჭო აირჩიეს და 8 წევრი დაამტკიცეს. დროებითი საბჭოს ხელმძღვანელი ირაკლი ფავლენიშვილი გახდა. საბჭოს წევრები არიან:

  • ირაკლი ფავლენიშვილი;
  • პეტრე ცისკარიშვილი;
  • ანა წითლიძე;
  • ლაშა ფარულავა;
  • გიორგი ჩალაძე;
  • ლევან ბეჟაშვილი;
  • გიორგი ბოტკოველი;
  • ირაკლი ნადირაძე.

დროებითი მმართველობის საბჭოს მე-9 წევრობაზე თინა ბოკუჩავამ უარი განაცხადა. მისი განმარტებით, ის პარტიაში მუშაობას პოლიტსაბჭოს რიგით წევრად გააგრძელებს.

პეტრე ცისკარიშვილის თქმით, პარტიის თავმჯდომარის, გენერალური მდივნის და სხვა თანამდებობები გაუქმდა და მათ დროებითი საბჭო ჩაანაცვლებს. მმართველი საბჭოს კომპეტენციაში შედის ყველა ის უფლებამოსილება, რაც წინა წესდებით პარტიის თავმჯდომარესა და გენერალურ მდივანს ეხებოდა.

მისივე განმარტებით, დამატებით შეიქმნება "რეფორმატორების საბჭო", რომელსაც მიხეილ სააკაშვილი უხელმძღვანელებს, ხოლო მისი აღმასრულებელი მდივანი ნანუკა ჟორჟოლიანი იქნება.

"გაუქმდა პარტიის თავმჯდომარის, გენერალური მდივნისა და სხვა თანამდებობები თუ პოზიციები და შეიქმნა კოლეგიალური მმართველობის ორგანო — მმართველი საბჭოს სახით.

ნანუკა ჟორჟოლიანი ჯერ არ არის პარტიის წევრი და არც პარტიის მმართველობით ორგანოებში იღებს მონაწილეობას. კონცეფცია მდგომარეობს იმაში, რომ პარტიის მიღმა შეიქმნას რეფორმების საბჭო, სადაც არაპარტიული შემადგენლობით — ექსპერტები, გულშემატკივრები — მიიღებენ მონაწილეობას საბჭოს საქმიანობაში.

ირაკლი ფავლენიშვილი წარდგა ყრილობის წინაშე და ის არჩეულ იქნა მმართველი საბჭოს თავმჯდომარედ.

მმართველი საბჭოს კომპეტენციაში შედის ყველა ის უფლებამოსილება, რაც წინა წესდებით ეხებოდა პარტიის თავმჯდომარესა და გენერალურ მდივანს. ეს კომპეტენციები გაერთიანდა და მათ ერთიანად აღასრულებს მმართველი საბჭოს კოლეგიალური ორგანო," — განაცხადა ცისკარიშვილმა.

შეგახსენებთ, ერთიანი ნაციონალური მოძრაობის ყრილობაზე პარტიის აწ უკვე ყოფილი თავმჯდომარე თინა ბოკუჩავა მივიდა. ბოკუჩავამ მედიასთან საუბრისას განმარტა, რომ ის ყრილობაზე სამი მიზეზით იმყოფება — მადლობა გადაუხადოს თავის მხარდამჭერებს, დააფიქსიროს პოზიცია, რომ მისთვის თანამდებობას მნიშვნელობა არ აქვს და წარმატება უსურვოს ყრილობის მონაწილეებს. ბოკუჩავამ უარყო პარტიის დატოვება და აღნიშნა, რომ ის ბრძოლას პოლიტსაბჭოს რიგით წევრად გააგრძელებს.