საფრანგეთში, ფონტენბლოს მახლობლად (პარიზიდან 60 კილომეტრში) გაჩენილი ტყის ხანძრის გამო ორი პირი დააკავეს. საფრანგეთის შინაგან საქმეთა მინისტრმა, ლორან ნუნიესმა ორშაბათს, 13 ივლისს განაცხადა, რომ ისინი პატიმრობაში იმყოფებიან "განზრახ ან გაუფრთხილებლობით ცეცხლის წაკიდების" ეჭვის საფუძველზე. ინფორმაციას Deutsche Welle ავრცელებს.

გამომძიებლების თქმით, ორი ეჭვმიტანილიდან ერთ-ერთი 18 წლისაა და მას კრიმინალური წარსული არ აქვს. წყაროს ინფორმაციით, დაკავებისას ახალგაზრდას ხელები ჭვარტლით ჰქონდა დაფარული და თან სანთებელა აღმოაჩნდა.

ეს არის პარიზში ბოლო დროის ერთ-ერთი ყველაზე სერიოზული ტყის ხანძარი. ხელისუფლების განცხადებით, 1 300 ჰექტარზე მეტი ტყის მასივი დაიწვა და 1 000-მდე ადამიანის უსაფრთხო ადგილას ევაკუაცია გახდა საჭირო. სააგენტო AFP-ის ცნობით, შემთხვევის ადგილზე 600 მეხანძრე მუშაობდა, პროცესში ჩართული იყო საავიაციო ტექნიკაც.

ცეცხლის ჩასაქრობად მობილიზებული იყო ოთხი Canadair-ის ტიპის თვითმფრინავი, ორი Dash-ის ტიპის თვითმფრინავი და სამი ვერტმფრენი.

"ჯამში წყალი 187-ჯერ დაიცალა", — განაცხადა სამაშველო ოპერაციების მეთაურმა ჟან-მარკ სიკარმა.

დაღამებისას, ხანძართან საბრძოლველად ადგილზე მორიგეობაზე 600-მდე მეხანძრე დარჩა. სტიქიის გამო რამდენიმე ავტომაგისტრალის ჩაკეტვა გახდა საჭირო.

Deutsche welle წერს, რომ საფრანგეთი წლის დასაწყისიდან სიცხის მესამე ტალღას განიცდის. ტყის ხანძრებმა ქვეყანაში 32 000 ჰექტარი მიწა დააზიანა, რაც დაახლოებით ორჯერ აღემატება გასული წლის იმავე პერიოდის მაჩვენებელს. მთელი ქვეყნის მასშტაბით სამართალდამცველებმა 59 პირი დააკავეს, რომლებსაც ეჭვმიტანილად მიიჩნევენ ცეცხლის განზრახ წაკიდებაში ან გაუფრთხილებლობაში (მაგალითად, ჩაუმქრალი სიგარეტის ნამწვის დატოვებაში).