2024 წლის 3 დეკემბერს საპროტესტო აქციაზე დაშავებული ალექსი თირქია საფრანგეთში ჩატარებულ უახლესი MRI კვლევის გამოსახულებას აქვეყნებს. ის წერს, რომ მისი "მდგომარეობა პირდაპირ უკავშირდება თავის ქალისა და თავის ტვინის მიდამოს მძიმე ტრავმას და საჭიროებს შესაბამისი სპეციალისტის ჩართულობას". პროევროპულ აქციაზე დაშავებული ითხოვს "შესაძლებლობას, აღიდგინოს ის, რაც ძალადობის შედეგად დაკარგა".

"ეს არის საფრანგეთში ჩატარებული ჩემი უახლესი MRI/სამედიცინო კვლევის გამოსახულება. ჩემი შუბლის ძვლის დაზიანება დღემდე საჭიროებს რეკონსტრუქციულ ოპერაციას და იმპლანტაციას, ასევე მაქვს თვალთან დაკავშირებული პრობლემები და მჭირდება ქუთუთოს/პტოზის ოპერაცია.

ყველაზე მძიმე კი ის არის, რომ ბრძოლა მხოლოდ ჯანმრთელობის აღდგენისთვის აღარ მიწევს.

საფრანგეთში მითხრეს, რომ თუ რეკონსტრუქციულ ოპერაციას პლასტიკური ქირურგი ჩაატარებს და არა ნეიროქირურგი, ამ ოპერაციის დაფინანსების საკითხი პრობლემური ხდება/შეიძლება არ დაფინანსდეს. ჩემი მდგომარეობა კი პირდაპირ უკავშირდება თავის ქალისა და თავის ტვინის მიდამოს მძიმე ტრავმას და ამიტომ საჭიროებს შესაბამისი სპეციალისტის ჩართულობას.

მე ვითხოვ შესაძლებლობას, აღვიდგინო ის, რაც ძალადობის შედეგად დავკარგე. ეს არის იმ ძალადობის კვალი, რომლის გამოც დღესაც მიწევს ოპერაციებისთვის, ჯანმრთელობისთვის და ელემენტარული სამართლიანობისთვის [ბრძოლა].

მე ვხედავ იმ ხელისუფლების ხელწერას, რომლის მმართველობის პირობებშიც მოქალაქის სხეულზე დარჩენილი ჭრილობაც კი შეიძლება წლების განმავლობაში უპასუხოდ დარჩეს.

ჩემი თავის ქალა შეიძლება აღდგეს. თვალის მდგომარეობის გაუმჯობესებაც შესაძლებელია.
მაგრამ ის, რაც 2024 წლის 3 დეკემბერს მოხდა, ვერ წაიშლება. ეს არის ჩემი ისტორია.
ეს არის ჩემი სხეულის მტკიცებულება. და ეს არის ის ფასი, რომლის გადახდაც მე მომიწია საკუთარი პოზიციის გამოხატვის გამო". — წერს თირქია და MRI კვლევის გამოსახულებას აქვეყნებს.

შეგახსენებთ, რომ 22 წლის ალექსი თირქია 2024 წლის 3 დეკემბერს გამთენიისას, თბილისში, საპროტესტო აქციის დაშლისას დაშავდა, მას წარბთან გაზის კაპსულა მოხვდა და რეანიმაციაში აღმოჩნდა. სამედიცინო დოკუმენტაციის მიხედვით, ჰქონდა სკალპის ღია ჭრილობა, შუბლის ძვლისა და თვალბუდის ზედა კედლის მოტეხილობა და თავის ტვინის დაზიანება. კომაში დაახლოებით ექვსი დღე იმყოფებოდა. მოგვიანებით გონს მოვიდა, მაგრამ მარცხენა თვალით მხედველობის პრობლემა დარჩა; სამწვერა ნერვის დაზიანების გამო თვალის სრულად გახელაც უჭირდა. ის მკურნალობის კურსს ამ დრომდე გადის.