ადვოკატ ია სირანაშვილის ინფორმაციით, სააპელაციო სასამართლომ საჩივარი დაუშვებლად ცნო და თამაზ ელიზბარაშვილი პატიმრობაში დატოვა.

4 სექტემბერს თბილისის საქალაქო სასამართლომ ელიზბარაშვილს აღკვეთი ღონისძიების სახით პატიმრობა შეუფარდა. პროკურატურა ელიზბარაშვილს საქართველოს სისხლის სამართლის კოდექსის 151-ე მუხლის პირველი ნაწილით ედავება, რაც სიცოცხლის მოსპობის მუქარას გულისხმობს. აღნიშნული ბრალი ერთ წლამდე პატიმრობას ითვალისწინებს.

1-ელ სექტემბერს, დაახლოებით საღამოს 9 საათზე, ბიზნესმენი თამაზ ელიზბარაშვილი საკუთარ ბინაში ჩხრეკისას დააკავეს, მანამდე სამართალდამცავებმა ჩხრეკა ჩაატარეს მის ავტომობილში. როგორც პოლიციელები ადგილზე აცხადებდნენ, იარაღს ეძებდნენ.

საქმის დეტალები

ელიზბარაშვილის საქმეს შვიდი დაზარალებული ჰყავს. საქმეში პროსამთავრობო ტელეკომპანია "იმედის" თანამშრომლები ფიგურირებენ. "იმედის" პოდკასტის — "FAKE კონტროლის" წამყვანმა, შაკო კუჭაშვილმა სოციალურ ქსელში დაადასტურა, რომ მას და თამაზ ელიზბარაშვილს სიტყვიერი შელაპარაკება მოუვიდათ. სისხლის სამართლის საქმის ფიგურანტები არიან ამავე პოდკასტის წამყვანები — ნიკა კლდიაშვილი და სანდრო გამსახურდია. სანდრო გამსახურდია სიუჟეტებს "იმედის კვირისთვისაც" ამზადებს. საქმის ფიგურანტი სხვა პირების ვინაობა ჯერჯერობით უცნობია.

პროკურატურის ცნობით, 30 აგვისტოს თბილისში, ერთ-ერთ რესტორანში, თამაზ ელიზბარაშვილს დაზარალებულათან ჰქონდა სიტყვიერი კონფლიქტი, რა დროსაც დაემუქრა და გააფრთხილა, რომ დაახლოებით 30 წუთში დაბრუნდებოდა. ის მართლაც დაბრუნდა. პროკურატურის მტკიცებით, "ელიზბარაშვილი იყო შეიარაღებული და ცდილობდა რესტორანში შეჭრას. ასევე, განაგრძობდა მუქარას და გინებას დაზარალებულების მისამართით".

4 სექტემბრის სასამართლო პროცესზე ელიზბარაშვილმა 30 აგვისტოს ღამის ინციდენტის დეტალები გაიხსენა. ბრალდებულის თქმით, შაკო კუჭაშვილმა და მისმა თანმხლებმა პირებმა სიტყვიერი შეურაცხყოფა მიაყენეს. ისინი მას სოციალურ ქსელში გაკეთებული განცხადებების გამო ბოდიშის მოხდას სთხოვდნენ. ელიზბარაშვილი აცხადებს, რომ ის რესტორანში მცირეწლოვან შვილთან ერთად იმყოფებოდა და უსაფრთხოების მიზნით ბავშვი კონფლიქტის ადგილს განარიდა.

8 სექტემბერს ელიზბარაშვილმა ციხიდან წერილი გაავრცელა, სადაც წერს, რომ პროტესტის ნიშნად შიმშილობას იწყებს და საზოგადოებას მხარდაჭერისკენ მოუწოდებს.