როგორც აღმოჩნდა, ბანქოს სახლს რუსი ტროლებიც უყურებენ, თუმცა არა იმ მიზეზით, რა მიზეზითაც თქვენ. Yahoo-ს ინფორმაციით, ისინი ნეტფლიქსის სერიალს ამერიკულ პოლიტიკაზე ინფორმაციის მისაღებად უყურებდნენ.

როგორც ცნობილია, „ტროლების ქარხანა“ ამერიკის 2016 წლის საპრეზიდენტო არჩევნებში აქტიურად იყო ჩართული. გავრცელებული ინფორმაციით, რუსული პროპაგანდა კრემლის, კონკრეტულად კი ვლადიმერ პუტინის, ინტერესებს ჰილარი კლინტონის წინააღმდეგ ატარებდა. სწორედ ამაში „დაიხმარეს“ მათ ბანქოს სახლი.

ინფორმაცია რუსულ ტელეარხ დოჟდს ერთ-ერთმა ტროლმა მიაწოდა, რომელიც ტელეკომპანიას „მაქსიმის“ სახელით გაეცნო:

„თავდაპირველად მათ ინგლისურ ენაზე ბანქოს სახლის ყურება მოგვთხოვეს. აშშ-ს მთავარი პრობლემების გასაცნობად ეს აუცილებელი იყო. ესენი იყო სექსუალური უმცირესობების, იარაღის და გადასახადების პრობლემები“.

ვაშინგტონ პოსტის ანგარიშის მიხედვით, რუსეთი აშშ-ის არჩევნებზე გავლენის მოხდენას Google-ის მეშვეობითაც ცდილობდა.