ჯანდაცვის მინისტრის ყოფილი მოადგილე, ილია ღუდუშაური დააკავეს. ამის შესახებ ინფორმაცია "ტვ პირველმა" გაავრცელა.

ილია ღუდუშაურის ადვოკატი დიმიტრი მჭედლიშვილი "ტვ პირველთან" სატელეფონო ინტერვიუში აცხადებს, რომ დაკავებულისთვის ბრალი ჯერ არ წარუდგენიათ. ის დაკავებულს დღეს მოინახულებს და ბრალის წარდგენაც დღეს მოხდება.

"ბრალის წარდგენა არ მომხდარა და აქედან გამომდინარე საქმის მასალები ჯერ არ მაქვს. როგორც ვიცი, წუხელ [დააკავეს], დეტალები არ ვიცი, არ შევსულვარ, დღეს უნდა შევიდე, როგორც ვიცი, დღეს წარუდგენენ ბრალს და დღეს მომცემენ მასალებს... რაზეა დაკავებული, რას ედავებიან, ვერაფერს ვერ გეტყვით", — ამბობს "ტვ პირველთან" სატელეფონო ინტერვიუში დიმიტრი მჭედლიშვილი.

რას ედავებიან ილია ღუდუშაურს ჯერჯერობით უცნობია.

ჯანდაცვის მინისტრის, ზურაბ აზარაშვილის მოადგილედ ილია ღუდუშაური 2022 წლის იანვარში დაინიშნა. მანამდე ის საქართველოს მუნიციპალური განვითარების ფონდის აღმასრულებელი დირექტორის მოადგილე იყო.

ცნობისათვის, ილია ღუდუშაურის ძმა, თავდაცვის სამინისტროს შესყიდვების დეპარტამენტის ყოფილი უფროსი ვლადიმერ ღუდუშაური გასული წლის ივლისში ჯგუფის მიერ დიდი ოდენობით თანხის გაფლანგვის ბრალდებით დააკავეს. მასთან ერთად დააკავეს თავდაცვის მინისტრის ყოფილი მოადგილე, გიორგი ხაინდრავა და ჯუანშერ ბურჭულაძის ცოლის ძმა, ვასილ მხეიძე.
გამოძიების ინფორმაციით, ჯუანშერ ბურჭულაძის მოადგილემ, გიორგი ხაინდრავამ და თავდაცვის სამინისტროს შესყიდვების დეპარტამენტის იმდროინდელმა უფროსმა, ვლადიმერ ღუდუშაურმა ბურჭულაძის ცოლის ძმის, ვასილ მხეიძის დახმარებით, სამინისტროს მიერ სამხედრო ჰოსპიტლისთვის, მაგნიტურ-რეზონანსული ტომოგრაფის აპარატის შეძენის პროცესში მიზანმიმართული ქმედებებით არაკონკურენტული გარემო შექმნეს და თავდაცვის სამინისტროს კუთვნილი 1 333 728 ლარი გაფლანგეს.

ვლადიმერ ღუდუშაურმა საპატიმრო 2025 წლის ოქტომბერში გირაოს სანაცვლოდ დატოვა.