ჰარვი ვაინშტაინი ათწლეულების განმავლობაში ჰოლივუდის გავლენიანი პროდიუსერი იყო, თუმცა მისი კარიერა იმ ქალებმა დაასრულეს, რომლებზეც ის წლების განმავლობაში ძალადობდა.

ვაინშტაინი პირველად მსახიობმა ეშლი ჯადმა, ნიუ-იორკ თაიმსის საშუალებით ამხილა. მისი წერილის მიხედვით, ვაინშტაინმა, 90-იან წლებში, ის სასტუმროს ნომერში კონტრაქტის პირობებზე სასაუბროდ დაიბარა, შემდეგ კი დიალოგი სააბაზანოში შესთავაზა და მასთან ერთად შხაპის მიღება მოსთხოვა.

ეშლი ჯადის გარდა, ჰარვის სექსუალური შევიწროვების ბრალდებით უამრავი ქალი ადანაშაულებს, მათ შორის მისი ყოფილი ასისტენტები და ჰოლივუდის ისეთი გავლენიანი მსახიობები, როგორებიც არიან ანჯელინა ჯოლი და გვინეტ პელტროუ.

გუშინ სამმა ქალმა ჰარვი ვაინშტაინი გაუპატიურებაში დაადანაშაულა. მათგან ერთ-ერთი იტალიელი მსახიობია, რომლის თქმითაც, ვაინშტაინს მასთან ძალადობით ჰქონდა ორალური და ვაგინალური სექსი. ოთხი ქალი ამბობს, რომ ვაინშტაინი მათ მათი ნების საწინააღმდეგოდ შეეხო. ქალების ნაწილის თქმით, ვაინშტაინი მათ წინაშე მასტურბირებდა.

გუშინ ნიუ-იორკერმა პირველად გამოაქვეყნა 2015 წლის ჩანაწერი, რომელშიც ვაინშტაინი იტალიელ მოდელს, ამბრა გუტიერესს, აბაზანაში შეყოლას დაჟინებით სთხოვს. მოდელი უარობს, რადგან მისთვის წინა მსგავსი შემთხვევა უსიამოვნოდ დასრულდა, თუმცა ვაინშტაინი მას ეუბნება, რომ 5 წუთის გამო "მეგობრობას" ნუ დაანგრევს.

– გეუბნები, ახლავე შემოდი.

– რა უნდა გავაკეთოთ მანდ?

– არაფერი! მე შხაპი უნდა მივიღო. შენ კი უბრალოდ იჯდები და რამეს დალევ.

– მე არ ვსვამ.

– წყალი დალიე, ერთი ჭიქა წყალი მაქვს.

– არ შეიძლება აქ დავრჩე?

– არა, ახლავე უნდა შემოხვიდე.

– არა. არ მინდა შემოსვლა.

– არაფერს დაგიშავებ, გპირდები.

– ვიცი, მაგრამ არ მინდა, ბოდიში, მაგრამ არ შემიძლია.

– ახლავე შემოდი.

– არა, გუშინ აგრესიული იყავი ჩემ მიმართ.

– ვიცი, მაგრამ ახლა არაფერს გავაკეთებ, გთხოვ, შემოდი.

– მე არ მინდა, რომ შემეხო.

– გეფიცები, არ შეგეხები, უბრალოდ, დაჯექი ჩემთან ერთად, არ დამტოვო ამ სასტუმროში შერცხვენილი, მე სულ აქ ვარ.

– ვიცი, მაგრამ არ მინდა.

– შემოდი და დაჯექი აქ, ერთი წუთით. მე ამას ვითხოვ შენგან.

– არა, არ შემიძლია.

– შედი აბაზანაში.

– მე არ მინდა იმის გაკეთება, რაც არ მინდა, რომ გავაკეთო.

– ჰეი, მოდი აქ! მომისმინე.

– მე დაბლა ჩავდივარ.

– მე არაფერს დაგიშავებ. იცოდე, თუ ამ სასტუმროში ასე შემარცხვენ, სადაც სულ ვრჩები, ვეღარასდროს მნახავ, კარგი? სულ ესაა.

– მე არ გარცხვენ, უბრალოდ ჩემთვის ეს კომფორტული არ არის.

– ძვირფასო, არ იჩხუბო ჩემთან, დერეფანში ვდგავართ. არაფერს დაგიშავებ, შვილებს გეფიცები, უბრალოდ შემოდი, მე ცნობილი კაცი ვარ.

– ახლა ძალიან არაკომფორტულად ვგრძნობ თავს.

– შემოდი ახლავე და ამ წუთში. როგორც კი ასისტენტი ჟაკეტს მომიტანს, მერე შეგიძლია წახვიდე.

– გუშინ რატომ შემეხე მკერდზე?

– გთხოვ, ბოდიში, უბრალოდ ახლა შემოდი, მე ამას შეჩვეული ვარ. შემოდი.

– შენ ამას შეჩვეული ხარ?

– კი, შემოდი,

– მაგრამ მე არ ვარ ამას შეჩვეული.

– არაფერს დაგიშავებ, შემოდი და აქ დაჯექი. შემოდი ახლავე და აქ დაჯექი.

– არა, არ მინდა.

– შენ თუ ახლა ამას არ გააკეთებ [ყვირილით] სამუდამოდ წადი და აღარასდროს დამირეკო. კარგად იყავი, მე შეგპირდი, რომ არაფერს დაგიშავებდი.

– ვიცი, მაგრამ გუშინ მეტისმეტი მოგივიდა.

– გთხოვ, შენ ახლა სცენას მართავ. ნუ გაინადგურებ ჩემთან მეგობრობას ხუთი წუთის გამო.

– არა, მე წასვლა მინდა, არ შემიძლია ამის გაკეთება, ეს მეტისმეტია.

– ოკ, ნახვამდის, ნახვამდის.

აუდიო ჩანაწერი 2015 წლისაა. ის გუშინ ღამით ნიუ-იორკერმა გაავრცელა.

ჩანაწერის გავრცელებიდან რამდენიმე საათში ჰარვი ვაინშტაინის ცოლმა, ჯორჯიანა ჩეპმენმა, განქორწინებაზე შეიტანა საბუთები.

გაიგეთ მეტი: სექსუალური შევიწროება კინოინდუსტრიაში - ჰოლივუდი ჰარვი ვაინშტაინის წინააღმდეგ.