რამდენიმე წუთის წინ ცნობილი გახდა, რომ ქართულმა ფილმმა, რვა წუთი, მანჰეტენის ფესტივალი მოიგო.

ყოველ წელიწადს, ერთი კვირის განმავლობაში, მსოფლიოს 100 ათასი კინომოყვარული ერთად იყრის თავს და მანჰეტენის კინოფესტივალის ფინალში გასულ ფილმები აფასებს.

ფილმებს, რომლებსაც მანჰეტენის მოკლემეტრაჟიანი ფილმების ფესტივალის ჟიური საუკეთესოდ დაასახელებს, მსოფლიოს 300 კინოთეატრი უშვებს.

წელს ფესტივალში მონაწილეობა ათასზე მეტმა ფილმმა მიიღო და საუკეთესო 15 გამოვლინდა. მათ შორის ქართული ფილმიც აღმოჩნდა: 8 წუთი.

მანჰეტენის კინოფესტივალის ჟიურიმ შორთლისტში გასული 15 ფილმიდან ათი ფინალისტი შეარჩია და ამ ათეულში მოხვდა 8 წუთიც. ათეულში მოხვედრა კი იმას ნიშნავს, რომ ფილმი 2018 წლის ოსკარებზე მონაწილეობის უფლებას ავტომატურად მიიღებს.

ფილმის სიუჟტი აპოკალიფსურ სიუჟეტს ეხება, როდესაც მზე ქრება. 8 წუთი კი ზუსტად ის დროა, რაც მზის სხივს დედამიწამდე მოსასვლელად სჭირდება.

დანარჩენი მსოფლიოს მსგავსად კი თბილისიც პანიკაშია. ფილმში გადმოცემულია ის ქაოსი, გაუგებრობა და სასოწარკვეთა, რომელიც ადამიანების ისტორიის უკანასკნელ 8 წუთს ასახავს.

SiblerFilms ახალგაზრდა რეჟისორებს (გიორგი გოგიჩაიშვილი, დათო აბრამიშვილი), სცენარისტებს (მარი ბექაური, ზაზა კოშკაძე) და პროდიუსერებს (გეგა ხმალაძე, მაგდა დათუაშვილი) აერთიანებს, რომელთაც უკვე მიაღწიეს წარმატებებს საქართველოში. მათი სრულმეტრაჟიანი ფილმის სცენარი ინგა 2016 წელს ბათუმის საერთაშორისო კინოფესტივალზე, სცენარების კონკურსის გამარჯვებული გახდა და იმავე წელს, საქართველოს ეროვნული კინოცენტრის კონკურსიც მოიგო.