Palitra News-მა გაავრცელა ვიდეო, სადაც, მათივე ცნობით, რუსი ეროვნების ქალი, ინგოროყვას კლინიკაში შეყვანის შემდეგ სამედიცინო პერსონალს მოულოდნელად თავს ესხმის, კბენს კისრის არეში და ძირს აგდებს.

NEWS.On.ge-ს ინგოროყვას საუნივერსიტეტო კლინიკის იურისტმა, თამარ როყვამ დაუდასტურა, რომ შემთხვევა მათ კლინიკაში მოხდა.

"37 წლის ქალბატონი იქნა შემოყვანილი გუშინ ჩვენთან კლინიკაში, უტარდებოდა შესაბამისი სამედიცინო გამოკვლევები, როდესაც მოულოდნელად თავს დაესხა ჩვენს ექთანს. საბედნიეროდ, ექთნის მდგომარეობა არ არის მძიმე, ზედაპირული დაზიანებები აქვს მიღებული. ჩვენი მხრიდან რეაგირება მოხდა უმალვე, ჩაერთო დაცვის სამსახური, გამოძახებული იქნა საპატრულო პოლიცია, აღნიშნული პიროვნება გადაყვანილი იქნა შესაბამისს საგამოძიებო ორგანოში, ჩვენი მხრიდან ყველა საჭირო ინფორმაცია გადაცემულია შესაბამისს ორგანოსთვის და ყველანაირად ვთანამშრომლობთ ჩვენი თანამშრომლების დაცვის მიზნით," — განაცხადა იურისტმა.

კითხვაზე — რა ჩივილებით მიმართა ქალმა კლინიკას, იურისტმა არ გვიპასუხა. მხოლოდ დასძინა, რომ ის კლინიკაში შემოყვანისას უგონო მდგომარეობაში არ იმყოფებოდა.

შსს-მ NEWS.ON.ge-ს განუცხადა, რომ მომხდარზე გამოძიება სისხლის სამართლის კოდექსის 126-ე მუხლით (ძალადობა) არის დაწყებული.