საქართველოს რეგიონული განვითარებისა და ინფრასტრუქტურის მინისტრის, ზურაბ ალავიძის თქმით, ხვალისთვის ბორჯომის ხეობაში ხანძარი უკვე ლოკალიზებული იქნება:

"სპეციალისტებთან ერთად ვიყავით დაზვერვაზე და ზუსტი წერტილები გვაქვს აღებული, გვაქვს სტრატეგია. კერა-კერა ამუშავებენ ვერტმფრენები ხანძარს და ინტენსიურად იმუშავებენ დაღამებამდე. დღეს თუ ქარმა არ შეგვიშალა ხელი ხვალისთვის გაცილებით უკეთესი მდგომარეობა უნდა გვქონდეს, ფაქტობრივად, დიდი ვარაუდი გვაქვს რომ შევძლებთ ლოკალიზებას".

მისივე თქმით, ამ დროისთვის დამწვარი ტერიტორიის ფართობი მისთვის უცნობია და ამას სპეციალისტები დაითვლიან.

უკვე მეხუთე დღეა ბორჯომის რაიონში, წაღვერის ტყეში ხანძარია. 20 აგვისტოდან დღემდე სახანძრო ჯგუფების მუშაობის მიუხედავად, ხანძარი ტყის ნაწილში მაინც მძვინვარებს. ამ ეტაპზე არსებული მდგომარეობა საგანგებო სიტუაციების მართვის სამსახურის პრესსამსახურმა On.ge-ს მიაწოდა.