საქართველოში აშშ-ის სრულუფლებიანი ელჩის, იან კელის განცხადებით აშშ-ის მთავრობისგან დამატებითი დახმარება მოითხოვა:

"ჩვენ, როგორც საქართველოს პარტნიორს, გვსურს, მხარში დაგიდგეთ და ამისათვის მოვითხოვე აშშ-ის მთავრობისგან დამატებითი დახმარება. დავუკავშირდით აშშ-ის არმიის ევროპულ სარდლობას გერმანიაში და აშშ-ის საერთაშორისო განვითარების სააგენტოს (USAID). ჩემი აზრით, მთავარია, ვნახოთ რით შევძლებთ დახმარებას. ვიცი, რომ მეზობელი ქვეყნები უკვე დაეხმარნენ საქართველოს ცეცხლის ჩასაქრობად საჭირო აღჭურვილობით. ჩვენ ვაგრძელებთ კონტაქტს მთავრობასთან, რომ გავარკვიოთ, რა მიმართულებით შეგვიძლია დახმარება".

ბორჯომის ხეობაში უკვე მესამე დღეა მთის ფერდობები იწვის. გუშინ ცეცხლი ლოკალიზებული იყო, თუმცა ძლიერმა ქარმა ახლიდან გააღვივა ის.

საქართველოს პრემიერ მინისტრის, გიორგი კვირიკაშვილის განცხადებით, სომხეთიდან დამხმარე ეკიპაჟები ჩამოდიან. ბორჯომის ხეობაში ხანძრის ლოკალიზების სამუშაოებში, ასევე, აზერბაიჯანისა და თურქეთის დამხმარე ეკიპაჟები იღებენ მონაწილეობას. პრემიერის თქმით, რუსეთის ფედერაციამ დახმარების სურვილი გამოთქვა, თუმცა რუსეთის დახმარება საჭირო არ გახდა.

განმარტება: მასალის თავდაპირველ ვერსია ტელეკომპანია იბერიას მიერ გავრცელებული თარგმანის საფუძველზე მომზადდა, სადაც აღნიშნული იყო, რომ აშშ საქართველოში ხანძრის ჩასაქრობად არტილერიას გამოაგზავნიდა. ინფორმაცია ამერიკის საელჩოს ვებგვერდზე გავრცელებული განცხადების შემდეგ დაზუსტდა.