ინდოელმა თინეიჯერმა გოგომ 3D პრინტერით ლინზები და აპლიკაცია შექმნა, რომელსაც თვალის დაავადებების ამოცნობა შეუძლია.

ლინზებისა და აპლიკაციის გამოყენების შემდეგ, შეძლებთ მიიღოთ წინასწარი დიაგნოზი იმაზე, გაქვთ თუ არა დიაბეტური რეტინოპათია.

დიაბეტური რეტინოპათია სიბრმავის გამოწვევის ყველაზე გავრცელებული მიზეზია მათში, ვისაც დიაბეტი აქვს. დაავადების დიაგნოზირება 2-საათიანი დაკვირვების შედეგად ხდება, რაც ასევე სპეციალიზირებული კამერით თვალის ბადურაზე ფოტოს გადაღებას გულისხმობს.

16 წლის კავია კოპარაპუმ, პატარა ჯგუფის დახმარებით, შექმნა ხელოვნური ინტელექტის სისტემა, რომელიც დიაბეტურ რეტინოპათიის დიაგნოზირებას ფოტოთი ბევრად უფრო მოკლე დროში შეძლებს.

ფოტო: Kavya Kopparapu / IEEE Spectrum

თინეიჯერი გამომგონებლის გუნდში მისი ძმა და რამდენიმე კლასელი შედის. კოპარაპუმ ყველასთან გაიარა კონსულტაცია, ვისთანაც შეეძლო. მათ შორის, ექსპერტებთან, ოფთალმოლოგებთან და ნეიროფსიქოლოგებთან.

კოპარაპუმ დაავადების სწრაფად დიაგნოსტირების სისტემის შექმნა მას შემდეგ გადაწყვიტა, რაც მის ბაბუას დიაბეტური რეტინოპათია აღმოაჩნდა.

გოგონა ამბობს, რომ მისი ბაბუა ინდოეთის პატარა სოფელში ცხოვრობს და დიაგნოზირების დროულად ჩატარების საშუალება არ ჰქონდა.

"ინდოეთში არის პროგრამები, რომლებითაც ექიმებს სოფლებში აგზავნიან, თუმცა არის ძალიან ბევრი პაციენტი და არც ისე ბევრი ოფთალმოლოგი".

ოქტომბერში კოპარაპუს მიერ შექმნილ ინოვაციურ მეთოდს მუმბაის საავადმყოფოში გამოცდიან.