მიმდინარე წლის ივლისში, სომხეთის მთავრობის მიერ მიღებულმა გადაწყვეტილებამ, რუსული ენის სავალდებულო გაკვეთილების შემცირების შესახებ, დებატები გამოიწვია. Sputnik Armenia ვარაუდობს, რომ სომხეთს შესაძლოა განზრახული აქვს, ეტაპობრივად, სრულად ამოიღოს სავალდებულო რუსული ენა სკოლებიდან.

აღნიშნული გადაწყვეტილების შესახებ ინფორმაცია, 13 სექტემბერს, რუსულმა სამთავრობო მედიამ, განათლების სფეროში მოღვაწე მასწავლებლებზე დაყრდნობით, გაავრცელა. თუმცა, რუსულ მედიაში გავრცელებული ფაქტები ბოლომდე სიმართლეს არ შეესაბამება, რადგან იქ საუბარი იყო იმაზე, რომ სომხეთის მთავრობა სრულად აპირებდა რუსული ენის სასწავლო პროგრამიდან ამოღებას. რესპონდენტების ნაწილი ამას აკრიტიკებდა. თუმცა, იყვნენ ისეთებიც, ვინც გადაწყვეტილებას დადებითად აფასებდა.

Sputnik Armenia წერდა, რომ ივლისში მიღებული გადაწყვეტილების მიხედვით, მოსწავლეებს საშუალება უნდა ჰქონდეთ, რომ არჩევანი ორ უცხო ენას შორის გააკეთონ იმის ნაცვლად, რომ მათთვის პირველადი უცხო ენა რუსული იყოს.

OC-MEDIA-ს ცნობით, ცვლილება მე-2-დან მე-10 კლასის ჩათვლით მოსწავლეებს შეეხება. თუმცა, მე-4, მე-9, მე-11 და მე-12 კლასელები რუსულის სწავლას გააგრძელებენ.

Sputnik Armenia-სთან ინტერვიუში განათლების ექსპერტმა, სერობ ხაჩატრიანმა, განმარტა, რომ სამინისტროს ახალი დირექტივა არ იყო "არსებითი", რადგან 2021 წელს მიღებული ზოგადსაგანმანათლებლო სახელმწიფო სტანდარტის მიხედვით, რუსული ენის სწავლა სომხეთში სავალდებულოა. ამ სტანდარტის მიხედვით, რუსული ენის სწავლება მე-2-დან მე-12 კლასის ჩათვლით სავალდებულოა. მოსწავლეებს მხოლოდ მესამე კლასიდან ეძლევათ დამატებით, რუსულის გარდა, სხვა უცხო ენის სწავლის შესაძლებლობა.

ხაჩატრიანის თქმით, სამინისტროს დირექტივა რუსული ენის სასწავლო გეგმიდან სრულად ამოღების საშუალებას არ მისცემს სკოლებს, მაგრამ რუსულ ენას არჩევითს გახდის. მისი თქმით, სკოლები კვლავ ვალდებულნი არიან, უცხო ენის კურსებს კვირაში მინიმუმ ორი საათი დაუთმონ.

ბრძოლა განათლებისთვის

საგანმანათლებლო სივრცეში რუსეთ-სომხეთის დაპირისპირების მიზეზი მხოლოდ რუსულის გაკვეთილების რაოდენობაზე დავა არაა.

2024 წლის აგვისტოში, რუსული მხარის პროტესტის შემდეგ, სომხეთის განათლების სამინისტრომ ისტორიის სახელმძღვანელოდან რუსეთის მიერ სომხეთის ანექსიის შესახებ ცნობები ამოიღო.

რუსეთის მხრიდან სომხეთში რუსული სახელმწიფო საშუალო სკოლების რაოდენობის გაზრდაზეც იყო მოთხოვნა. Civilnet-მა დაწერა, რომ სომხეთში მხოლოდ სამი სახელმწიფო რუსული სკოლაა. სომხეთის განათლების სამინისტროს მონაცემებით, 46 სომხური სკოლა ასწავლის რუსულ ენაზე, ხოლო მინიმუმ 60 სკოლა უზრუნველყოფს რუსული ენის სრულყოფილ გაკვეთილებს.

ამავდროულად, 2023 წლის ოქტომბერში, რუსმა დეპუტატებმა მიიღეს გადაწყვეტილება, რომ რუსული მართვის მოწმობებისთვის გადაეხედათ, რომელიც ქვეყანაში სამუშაო მიზნით გამოიყენებოდა.

რუსეთის სპიკერმა, ვიაჩისლავ ვოლოდინმა განაცხადა, რომ ეს გადაწყვეტილება იმის გამო იქნა მიღებული, რომ რუსულ ენას არ აქვს "ოფიციალური სტატუსი" სომხეთში.

ეს ყველაფერი ორ ქვეყანას შორის ურთიერთობების გაუარესების და სომხეთის მიერ სისხლის სამართლის საერთაშორისო სასამართლოს რომის სტატუტის რატიფიცირების ფონზე ხდება.

შესწორება: ამ სტატიის პირვანდელ ვერსიაში არასწორად ეწერა, რომ განათლების სამინისტრომ პირველად 2023 წელს გამოსცა დირექტივა რუსული ენის სწვალებაში ცვლილებების შეტანის შესახებ. სინამდვილეში, გადაწყვეტილება 2024 წლის ივლისში იქნა მიღებული.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.