რა ხდება: დეპუტატი დავით სერგეენკო საპარლამენტო მანდატს ტოვებს.

  • ინფორმაცია On.ge-ს პარლამენტის საზოგადოებასთან ურთიერთობის სამსახურში დაუდასტურეს.

დეტალები: სერგეენკომ საპროცედურო საკითხთა საპარლამენტო კომიტეტს განცხადებით უკვე მიმართა.

  • მის განაცხადს კომიტეტი 16 ნოემბერს განიხილავს და იმავე დღეს გავა საკითხი პლენარულ სხდომაზე.

კონტექსტი: ინფორმაცია, რომ დავით სერგეენკო პოლიტიკას ტოვებდა, მარტში გავრცელდა, მას შემდეგ, რაც ცნობილი გახდა, რომ ის იყო ერთ-ერთი დეპუტატი ქართული ოცნებიდან, ვინც არ მიიღო ე.წ. რუსული კანონის კენჭისყრაში მონაწილეობა.

  • თუ რა იყო მიზეზი იმის, რომ არ დაუჭირა კანონპროექტს მხარი, სერგეენკომ მაშინ თქვა:
  • "ვხედავდი, რომ ევროკავშირი, ამერიკის შეერთებული შტატები, საზოგადოების დიდი ნაწილი ძალიან ნეგატიურად უყურებდა ამ ყველაფერს. მართალი გითხრათ, ვერ გეტყვით, რომ დეტალებში შევედი და გავაანალიზე ეს კანონპროექტი, არ მაქვს ამის კომპეტენცია. მაგრამ ვხედავდი ამ დამოკიდებულებას და ეს იყო ალბათ გადაწყვეტილების საფუძველი".