H&M თბილისის პირველი მაღაზია გალერია თბილისში, 2017 წლის შემოდგომაზე გაუხსნება. კომპანიის საზოგადოებასთან ურთიერთობისა და მარკეტინგის განყოფილების განცხადებაში ნათქვამია, რომ იგი სამ სართულსა და 3 ათას კვადრატულ მეტრზე იქნება განთავსებული.

H&M-ში ქალის, მამაკაცისა და ბავშვის ტანსაცმლის, ფეხსაცმლის, აქსესუარებისა და თეთრეულის სრული ასორტიმენტი იქნება წარმოდგენილი:

"ძალიან გვიხარია, რომ როგორც იქნა, საქართველოში პირველ მაღაზიას ვხსნით! ჩვენთვის დიდი პატივია, თბილისელ მოდის მოყვარულებსა და ჩვენს მომავალ მომხმარებლებს ახალი სტილის პოვნისა და რაციონალური შოპინგის საშუალება მივცეთ და მოდაში საკუთარი განაცხადის გაკეთებაში დავეხმაროთ", - აღნიშნავს კლაუდია ოსვალდი, H&M-ის რეგიონალური მენეჯერი ავსტრიაში, სლოვენიაში, ხორვატიაში, სერბეთსა და საქართველოში.

ახალი მრავალფუნქციური ცენტრი გალერია თბილისი ყოფილი უნივერმაღი თბილისის ადგილას, მეტრო თავისუფლებასთან, 2017 წლის სექტემბერში გაიხსნება. ცენტრში წარმოდგენილი იქნება საშუალო და საშუალოზე მაღალი დონის ადგილობრივი და საერთაშორისო, მსოფლიოში ცნობილი ბრენდები.