ამის შესახებ სამხრეთ ოსეთის დე ფაქტო პრეზიდენტის მრჩეველმა, ვიაჩესლავ გობოზოვმა რუსულ სამთავრობო მედიასთან ისაუბრა.

რატომ არის მნიშვნელოვანი: იმისათვის, რომ სამხრეთ ოსეთი რუსეთისა და ბელარუსის საკავშირო სახელმწიფოს შეუერთდეს, მინსკმა საქართველოს ოკუპირებული ტერიტორიების დამოუკიდებლობა უნდა აღიაროს.

  • ბელარუსს ეს ამ დრომდე არ გაუკეთებია და საქართველოსთან დიპლომატიურ ურთიერთობებს ინარჩუნებს.

დეტალები: გობოზოვის აზრით, პრეზიდენტი ლუკაშენკო ადრე თუ გვიან მიხვდება, რა სარგებელს მოუტანს ბელარუსს ცხინვალის სუვერენიტეტის აღიარება.

  • "ჩვენ გვაქვს სურვილი, შევუერთდეთ რუსეთისა და ბელორუსის საკავშირო სახელმწიფოს, ეს არის ჩვენი ერთ-ერთი პრიორიტეტი. ამიტომ ჩვენ ვსაუბრობთ ბელორუსის მიერ ჩვენი აღიარების მნიშვნელობაზე, ეს გაგვიხსნის გზას საკავშირო სახელმწიფოსკენ და რესპუბლიკისთვის ახალ ჰორიზონტს", — თქვა მან.

კონტექსტი: ბელარუსი არ ცნობს საქართველოს ოკუპირებული ტერიტორიების სუვერენიტეტს.

  • თუმცა, ვლადიმერ პუტინის ახლო მოკავშირე, ბელარუსის პრეზიდენტი, ალექსანდრე ლუკაშენკო 2022 წლის 28 სექტემბერს ოკუპაციის კანონის დარღვევით ოკუპირებულ აფხაზეთში ჩავიდა.
  • მაშინ საგარეო საქმეთა სამინისტროში პროტესტის ნიშნად საქართველოში ბელარუსის ელჩი დაიბარეს.
  • იმავე წლის ნოემბერში ოკუპირებულ აფხაზეთში ბელარუსისა და რუსეთის კავშირის საპარლამენტო დელეგაცია იმყოფებოდა.