დეტალები: 14 ივნისს საზოგადოებრივი მაუწყებლის აჭარის ტელევიზიის თანამშრომელს, კობა ფარტენაძეს, უცნობი პირი თავს დაესხა.

  • ტელევიზიის ცნობით, შემთხვევა აჭარის რადიოსთან მოხდა.
  • მათივე ინფორმაციით, სამართალდამცველებმა ფარტენაძე უკვე გამოჰკითხეს.
  • პარალელურად, პოლიციის განყოფილებაში იმყოფებოდნენ მოწმეებიც.

შსს: როგორც On.ge-ს უწყებაში განუცხადეს, საქმეზე გამოძიება სსკ-ის 126-ე მუხლით მიმდინარეობს, რაც ძალადობას გულისხმობს.

  • დანაშაული ისჯება ჯარიმით ან საზოგადოებისათვის სასარგებლო შრომით 120-დან 180 საათამდე, ან შინაპატიმრობით 6 თვიდან ერთ წლამდე, ანდა თავისუფლების აღკვეთით ერთ წლამდე, იარაღთან დაკავშირებული უფლებების შეზღუდვით ან უამისოდ.

ჟურნალისტური ეთიკის ქარტია სამართალდამცავ უწყებებს მოუწოდებს, დროულად გამოიძიონ ფარტენაძეზე თავდასხმა.

  • ორგანიზაციაში ამბობენ, რომ მნიშვნელოვანია დადგინდეს, ხომ არ არის თავდასხმა დაკავშირებული ჟურნალისტის პროფესიულ საქმიანობასთან.
  • "ქარტიას არაერთხელ განუცხადებია, რომ ბოლო პერიოდში ჟურნალისტებზე გახშირებული თავდასხმების გამომწვევი ფაქტორები მედიის წარმომადგენლების მიმართ ჩადენილი დანაშაულების გაჭიანურებული და გამოუძიებელი საქმეებია. ასევე, თავდასხმები შეიძლება გამოიწვიოს მმართველი პარტიის წარმომდგენლების აგრესიულმა დამოკიდებულებამ ჟურნალისტების მიმართ", — ნათქვამია განცხადებაში.